Qazposhta QR Konstıtýtsııasynyń 20 jyldyǵyna arnalǵan marka shyǵardy
Markany bastyrý saltanaty Konstıtýtsııalyq Keńes ǵımaratynda ótti. Іs-sharaǵa «Qazposhta» AQ basqarma tóraǵasy Baǵdat Mýsın jáne Konstıtýtsııalyq Keńestiń tóraǵasy Igor Rogov qatysty.
Bul marka «Estelik jáne mereıtoılyq datalar» serııasynda shyǵarylǵan. 4 boıaýly ofsetti baspa, perforatsııasy jotaly. Shyǵarylym túri - markaly paraq. Paraqtyń ólshemi 130 h 108 mm. Markanyń ólshemi 26 h 36 mm. Paraqta 8 (segiz) marka bar. Poshtalyq markanyń nomınaly - «A» lıterasy (112 teńge) - zańdy tulǵalarǵa arnalǵan Qazaqstan Respýblıkasy aýmaǵynda jer ústi kóligimen 20 gramǵa deıingi salmaqta qarapaıym hat jiberý tarıfine sáıkes keledi. Taralymy - 5 000 dana. Sýretshi Q. Ibraıshın. Poshtalyq marka «Qazaqstan Respýblıkasy Ulttyq Bankiniń Banknot Fabrıkasy» Respýblıkalyq memlekettik kásipornynda basyp shyǵaryldy.
Aıta keteıik, «Qazposhta» AQ - poshtalyq, qarjylyq jáne logıstıkalyq qyzmetterdi usynatyn Qazaqstan Respýblıkasynyń ulttyq poshta operatory. Dúnıejúzilik poshta odaǵynyń múshesi, VISA International jáne MasterCard Worldwide halyqaralyq tólem júıeleriniń prıntsıpti qatysýshysy. «Samuryq-Qazyna» AQ kompanııanyń jalǵyz aktsıoneri bolyp tabylady.