QazMunaıGaz úshin asa mańyzdy baǵyttar qandaı
ASTANA. KAZINFORM – Kazakhstan Energy Week – 2025 jáne XVI Eýrazııalyq KAZENERGY forýmynda «QazMunaıGaz» UK» AQ basqarma tóraǵasy Ashat Hasenov kompanııa úshin asa mańyzdy baǵyttardy atady.
— Búginde aktsııalarymyzdyń quny kóterilip keledi muny qoǵamǵa jarııa etetin esep-qısaptarymyzdan da kóre alasyzdar. Degenmen, biz úshin birneshe baǵyt asa mańyzdy. Birinshisi — bul geologııalyq barlaý. Qazirgi tańda geologııalyq barlaý baǵytynda 13 jobany iske asyryp jatyrmyz. Bul saladaǵy belsendi jumys jalǵasady. Ekinshi basymdyq — munaı óńdeý. Іshki naryqty qamtamasyz etýge baǵyttalǵan naqty baǵdarlamalarymyz bar. Úshinshi — munaı-hımııa óndirisi. Biz strategııalyq mańyzy bar iri jobalardy júzege asyrýdamyz. Úkimettiń qoldaýymen Qazaqstan uzaq merzimde munaı óndirý kólemin jylyna 100 mln tonnadan joǵary deńgeıde ustap, jańa geologııalyq perspektıvalardy ıgerýdi jalǵastyrady, — dedi ol.
Kompanııa basshysy elimizde polıproplıen óndirisi qolǵa alynyp, jyl saıyn ónim kólemi arta túsetinin aıtty. Sonymen qatar polıetılen jobasy qolǵa alynǵanyn atap ótti.
— Balama energııa kózderin damytý jumystaryn da qolǵa aldyq. Bul jumysty kómirteksizdendirý jáne qorshaǵan ortany qorǵaý baǵytyndaǵy josparlardy tolyǵymen oryndaý úshin júrgizemiz. Qazaqstan Úkimet 2060 jylǵa deıingi kómirtegi beıtaraptyǵy baǵdarlamasyn maquldady. Soǵan oraı QazMunaıGaz iri kompanııa retinde bul baǵytta da jumys isteıdi. Jańaratyn energııa kózderine qatysty da jobalarymyz bar. Máselen, Jańaózende qatty otynmen de, tabıǵı gazben de jumys isteıtin gıbrıdti elektr stansasy salynyp jatyr. Taıaýda seriktesimiz Eni kompanııasymen 50 megavat iske qostyq. Bul jumysty jalǵastyramyz, — dedi ol.
Aıta keteıik, forýmǵa Qazaqstan Úkimetiniń múshelerimen qatar, Ortalyq Azııa elderiniń resmı delegatsııalary, halyqaralyq uıymdardyń basshylary, álemdik jáne ulttyq energetıkalyq kompanııalardyń top-menedjerleri, jetekshi sarapshylar men ǵylymı orta ókilderi qatysyp jatyr. KEW-2025 búginde energetıka salasyndaǵy eń ózekti máselelerdi talqylap, jańa sheshimder usynatyn ári óńirlik jáne jahandyq yntymaqtastyqty nyǵaıtýǵa yqpal etetin mańyzdy halyqaralyq alań retinde erekshelenýde. Bıylǵy is-sharaǵa 50-den astam memleketten 2,5 myńnan astam delegat pen 300-den astam iri kompanııanyń ókilderi jınaldy.