Qazirgideı kúrdeli kezeńde Konstıtýtsııanyń róli odan ári arta tústi-senator

NUR-SULTAN. QazAqparat - Senator Dana Nurjigitova Ata zańǵa sáıkes myzǵymas ustyndardyń kepili bolatyn tulǵa – Prezıdent ekenin jáne Qasym-Jomart Kemeluly Toqaev osynaý qıyn shaqta, taǵdyrymyz tarıh tarazysyna túsken kezeńde azamattardyń basty quqyqtarynyń saqtalýyna bar kúshin salyp otyrǵanyn jetkizdi.

«Al zań shyǵarýshy organdar ómirdiń ózi belgilep bergen ózgeristerge zańdyq negiz bolatyn sapaly qujattar ázirleý josparyn pysyqtap, memleketimizdiń damý baǵytyn aıqyndaýǵa belsene atsalysyp jatyr» - dedi senator QR Konstıtýtsııasynyń 25 jyldyǵyna oraı bildirgen pikirinde.

Ol óz sózinde úshinshi myńjyldyqtyń úshinshi onjyldyǵy adamzat tarıhyndaǵy túbegeıli ózgeristerden bastalyp otyrǵanyn jáne ol ózgerister ómirdiń barlyq salasyn sharpyǵanyn, turmys, sana, ekonomıka, saıasat, bári ózgerip jatqanyn aıtty.

Dana Nurjigitova «Bolashaq urpaq bul kezeńge baǵa bergende pandemııa kesirinen nemese pandemııanyń arqasynda dep saralaıtyn bolady. Biraq osyndaı turaqsyzdyq jaǵdaıynda memlekettilikti nyǵaıtyp, turaqtylyqty, adam ómirin, quqyqtary men bostandyqtaryn qamtamasyz etetin konstanta, basty qujat bar. Ol – Konstıtýttsııa. Qazirgideı kúrdeli kezeńde Konstıtýtsııanyń róli odan ári arta túskenin kórip otyrmyz» - dedi.