Kazinform tilshisi «Ózbekstannyń Altyn qalamy» syılyǵyn jeńip aldy
TAShKENT. KAZINFORM – Kazinform agenttiginiń tilshisi Mádıbek Jánibekov jýrnalıstıka salasyndaǵy Ózbekstannyń eń beldi «Altyn qalam» syılyǵynyń bas júldesin jeńip aldy.
Júldeni tabys etý saltanaty Tashkent tórindegi «Halyqaralyq forýmdar saraıynda» ótti. Oǵan mınıstrlikterdiń ókilderi, depýtattar, halyqaralyq jáne jergilikti aqparat quraldarynyń tilshileri, ardager jýrnalıster men shetelden kelgen mártebeli meımandar qatysty.
«Altyn qalam» halyqaralyq syılyǵyn jeńip alǵandardyń qatarynda Ózbekstanda úsh jyldan astam Kazinform agenttiginiń menshikti tilshisi qyzmetin atqarǵan Mádıbek Jánibekov bar. Júldeni tabystaý barysynda ózbek tarapy áriptesimizdiń baýyrlas eki el arasyndaǵy yntymaqtastyqty nyǵaıtýǵa qosqan aıryqsha úlesin atap ótti.
- Qazaqstan men Ózbekstan qarym-qatynasynyń jańa deńgeıge shyqqany Mádıbek Jánibekovtiń maqalalarynda jarqyn kórinis tapty. Ol ásirese, mádenı baılanystardyń damýyna ereshe úles qosty. Tıisinshe, «Altyn qalam» syılyǵy osy qajyrly eńbektiń elengenin kórsetedi, - dedi ózbekstandyq jýrnalıst Dmıtrıı Povarov.
Saltanatty is-sharada sóz alǵan Mádıbek Jánibekov bul jeńistiń artynda bútin Kazinform ujymynyń eńbegi jatqanyn atap ótti.
- «Altyn qalam» syılyǵyn alý - men úshin úlken mártebe. Bul - baýyrlas halyqtar arasyndaǵy ózara senimge negizdelgen dostyqtyń jańa deńgeıge shyqqanyn ańǵartady. Atalǵan marapat tek meniń jetistigim emes, ol Kazinform agenttigi ujymynyń eńbegi. Ózbekstan tarapynyń kórsetken qurmetine alǵys bildiremin. Qos el arasyndaǵy qarym-qatynastyń nyǵaıa berýine tilektespin. Sonymen qatar barlyq áriptesterimdi kásibı mereke - Buqaralyq aqparat quraldary qyzmetkerleri kúnimen quttyqtaımyn! - dedi Mádıbek Jánibekov.
Aıta keteıik, «Altyn qalam» halyqaralyq syılyǵy Ózbekstandaǵy BAQ ókilderine tabystalatyn ulttyq júlde sanalady. Ol 2006 jyly kórshiles eldiń prezıdentiniń bastamasymen taǵaıyndalǵan.
JIBEK JOLY telearnasy «Tumar-2025» ulttyq televızııalyq syılyǵynyń eki nomınatsııasy boıynsha jeńimpaz atanǵanyn jazǵan bolatynbyz.