Qazynashylyq komıtetiniń resmı ataýy bekitildi
ASTANA. KAZINFORM — Qazynashylyq komıteti resmı túrde Memlekettik qazynashylyq komıteti bolyp ózgertildi, dep habarlaıdy Qarjy mınıstrliginiń baspasóz qyzmeti.
QR Qarjy mınıstrligi Qazynashylyq komıtetiniń resmı ataýyn qaıta tirkeý aıaqtalǵany týraly habarlaıdy.
— Vedomstvonyń jańa ataýy — Qazaqstan Respýblıkasy Qarjy mınıstrliginiń Memlekettik qazynashylyq komıteti. Bul bıýdjet protsesteriniń ashyqtyǵy men tıimdiligin arttyrýǵa baǵyttalǵan reformalardyń biri. Bul ózgeris quzyrly organnyń memlekettik qarjy salasyn basqarýdaǵy mańyzdy róli men onyń mártebesiniń óskenin baıqatady. Osy rette komıtettiń ataýyn jańartýǵa qosymsha bıýdjet qarajaty bólinbegenin, sondaı-aq qyzmetkerlerdiń sanyn ulǵaıtý qarastyrylmaǵanyn aıta keteıik, — delingen mınıstrlik taratqan habarlamada.
Vedomstvonyń atyn ózgertý bıyl 15 naýryzdan bastap qoldanysqa engizilgen QR Bıýdjet kodeksiniń (№ 171-VII) erejelerinde qarastyrylǵan jáne Memleket basshysynyń 2022 jylǵy 10 qyrkúıektegi № 1005 Jarlyǵymen bekitilgen Memlekettik qarjyny basqarý tujyrymdamasynyń 2030 jylǵa deıingi talaptaryna sáıkes keledi.
Bul sheshim QR Qarjy mınıstriniń 2025 jylǵy 3 qazandaǵy № 565 buıryǵymen bekitilip, soǵan sáıkes buǵan deıin QR Premer-mınıstriniń birinshi orynbasary — Qarjy mınıstriniń 2019 jylǵy jeltoqsanda bekitken komıtet týraly erejesine tıisti ózgerister men tolyqtyrýlar engizildi.
Osydan buryn Aqtóbe oblystyq Qazynashylyq departamentiniń basshysy taǵaıyndalǵanyn jazǵan edik.