Qajylyqqa barýshylarǵa jalǵan vaktsınatsııa pasportyn jasaǵan týrkompanııa anyqtaldy

NUR-SULTAN. QazAqparat - Іshki ister mınıstrligi jalǵan PTR testisi men vaktsınatsııa pasportyn jasaý faktilerin anyqtady, dep habarlaıdy Polisia.kz.

Qazirgi ýaqytta halyqtyń densaýlyǵyn saqtaý Úkimetiniń ózekti baǵyttarynyń biri bolyp tabylady. Covid-19 koronavırýstyq ınfektsııasy jáne onymen baılanysty jaǵdaılar barlyq salalarǵa aıtarlyqtaı ózgerister engizdi. Memleket basshysy Qasym-Jomart Toqaev koronavırýspen kúresýdiń birden-bir ári senimdi joly vaktsına salý ekenin atap ótti.

PTR–testterdi qoldan jasaý jáne paıdalaný faktileri boıynsha Іshki ister mınıstrligi óz quzireti sheginde qajetti sharalar qabyldaýda. Keıbir azamattar qazirgi jaǵdaıdy paıda tabý úshin paıdalanady, PTR testileý nátıjeleri men vaktsınatsııa pasportyn qoldan jasaıdy, osylaısha koronavırýstyń taralýyna septesedi. Jyl basynan beri ishki ister organdary PTR-testileý nátıjeleri men vaktsınatsııa pasporttaryn qoldan jasaýdyń, sondaı-aq olardy paıdalanýdyń 30 jaǵdaıyn tirkedi. Mysaly, Almaty qalasynda qajylardyń Saýd Arabııasy Koroldigine ketýin rásimdeý kezinde vaktsınatsııalaý pasporttaryn (143 pasport) jappaı daıyndaýǵa qatysy bar týrıstik kompanııa anyqtaldy. Sotqa deıingi tergeý júrgizilýde, tintý is-sharalary barysynda uıymdastyrý tehnıkasy, mórler, blank ónimderi alyndy, sot saraptamalary taǵaıyndaldy. Eske sala keteıik, jalǵan qujat daıyndaǵany úshin 4 jylǵa deıin bas bostandyǵynan aıyrý, al ony paıdalanǵany úshin 40 táýlikke deıin qamaýǵa alý túrindegi qylmystyq jaýapkershilik qarastyrylǵan.