KazChess Awards 2026 jeńimpazdary anyqtaldy
ASTANA. KAZINFORM — Elordada dástúrli «KazChess Awards» syılyǵy tabystaldy. Qazaqstan shahmat federatsııasy 2025 jyldyń qorytyndysy boıynsha eldegi úzdik shahmatshylardy, jattyqtyrýshylardy, tóreshiler men seriktesterdi marapattady.
Bıyl nomınatsııalar tizimi 20 sanatqa deıin keńeıtildi, ótken jyly 12 nomınatsııa bolǵan. Baıqaýda alǵash ret «Bilim berýdegi shahmat» baǵdarlamasynyń pedagogteri men fýnktsıonerlerine arnalǵan nomınatsııalar engizildi. Sondaı-aq joǵary oqý oryndary men sportshylar úshin úsh arnaıy sanat qosyldy. Uıymdastyrýshylardyń aıtýynsha, nomınatsııalar sanynyń artýy qazaqstandyq shahmattyń qarqyndy damyp kele jatqanynyń aıqyn dáleli.
Federatsııa prezıdenti Tımýr Týrlovtyń aıtýynsha, 2025 jyl — qazaq shahmaty úshin tarıhı jyl boldy. Otandastarymyz halyqaralyq arenalarda joǵary nátıje kórsetip, 162 medal jeńip aldy, onyń ishinde — 64 altyn, 49 kúmis jáne 49 qola.
— Búgin biz túrli týrnırler men formattarda jetistikke jetken sportshylardyń eńbegin moıyndaımyz. Bul — shahmat salasyndaǵy eń mańyzdy sharalardyń biri. Jarystardy júıeli uıymdastyrýdyń arqasynda elimizde shahmat týrnırleriniń sany aıtarlyqtaı artty. Qazir el kóleminde aı saıyn túrli deńgeıdegi júzdegen týrnır ótedi. Onyń birneshe júzin federatsııa uıymdastyrady. Meniń basty mindetim — adam kapıtalyna ınvestıtsııa salý. Infraqurylym men ǵımarattarǵa qarjy bólýdi ákimdikter jaqsy jolǵa qoıǵan. Al biz adamdarǵa, tehnologııaǵa, brendterge, shákirtaqylarǵa jáne jarystardy damytýǵa kóńil bólýimiz kerek, — dedi Tımýr Týrlov.
Jeńimpazdar Qazaqstan shahmat federatsııasy prezıdıým músheleriniń daýys berý jolymen tańdaldy. Jeńimpazdardy anyqtaý kezinde sportshylardyń halyqaralyq jáne respýblıkalyq jarystardaǵy jeke kórsetkishteri eskerildi.
Jyl saıyn tek marapattar sany ǵana emes, qazaqstandyq shahmatshylardyń da ambıtsııasy artyp keledi. Olardyń qatarynda 15 jastaǵy Saýat Nuǵalıev te bar. Ol búgin ǵana klassıkalyq shahmattan erler arasyndaǵy Qazaqstan chempıonatynda jeńimpaz atandy. 13 týr qorytyndysynda 9 upaı jınaǵan jas shahmatshy marapattaý rásimine chempıondyq júldesimen keldi.
— Shynymdy aıtsam, bul jeńiske óte qýanyshtymyn. Sebebi bul júldeniń orny bólek. Bul joly men Qazaqstannyń eń myqty shahmatshylarymen synǵa tústim. Sondyqtan endi ózimdi eldiń úzdik shahmatshysy dep senimdi túrde aıta alamyn. Ótken jyly da osy marapattaý rásimine qatysqan edim. Alaıda ol kezde aıtarlyqtaı nátıje kórsete almadym. Sondyqtan marapattan úmittenbedim. Bıyl jaǵdaı ózgerdi dep oılaımyn, — dedi Saýat Nuǵalıev.
Qazaqstan shahmat federatsııasynyń úsh jyldyq júıeli jumysy naqty nátıje berip keledi. Atap aıtsaq, álemniń jasóspirimder quramalary arasynda elimiz birinshi orynǵa shyqty. Bir jyldyń ishinde shahmatshylar 162 halyqaralyq medal jeńip aldy. Al mektepterdegi «Bilim berýdegi shahmat» baǵdarlamasyna 60 myń bala qatysyp jatyr.
Aıta keteıik, Shahmatshy Alýa Nurman FIDE álemdik reıtıngisinde úzdik úshtikke endi.
