Qazatomónerkásip óz qyzmetine sanktsııa yqpalyn jiti qadaǵalap otyr
ASTANA. KAZINFORM – AQSh bıyldan bastap eldiń reseılik ýran ımportyna táýeldiligin tómendetýge tyrysyp keledi. Osy jyldyń 13 tamyzynda Reseıden tómen baıytylǵan ýran jetkizilimin shekteıtin zań kúshine enip qoıdy. Osyǵan oraı «Qazatomónerkásip» ulttyq kompanııasy daıyn ónimdi tasymaldaý men satýdy qosa alǵandaǵy kompanııa qyzmetine sanktsııalardyń áleýetti yqpalyn únemi qadaǵalap otyr. Bul jaıynda atalǵan kompanııa agenttiktiń resmı saýalyna bergen jaýabynda málimdedi.
Ulttyq kompanııa ázirge shekteýlerge tap kelmegendigin alǵa tartady. Degenmen, basshylyq eksportqa tyıym salýmen baılanysty táýekelderdi saraptap otyrǵanǵa uqsaıdy.
«Búginde sanktsııalar kompanııa qyzmetine aıtarlyqtaı áser etken joq. Degenmen mundaı oqıǵalardan týyndaǵan naryqtaǵy belgisizdik ýrannyń spot baǵasynyń, ulttyq valıýtanyń aıyrbas baǵamynyń jáne Qazatomónerkásiptiń baǵaly qaǵazdarynyń baǵa belgileýleriniń aıtarlyqtaı qubylmalylyǵyna alyp keldi», - dep atap ótti aktsıonerlik qoǵam.
AQSh Energetıka mınıstrligi reaktorlarǵa ıadrolyq otyn jetkizý tizbegin nyǵaıtý jáne Reseıden satyp alýlarǵa táýeldilikti azaıtý úshin otandyq jetkizýshilerden 2,7 mıllıard dollarǵa deıin baıytylǵan ýran satyp alýdy josparlap otyr.
2024 jyldyń 6 tamyzynda AQSh Saýda mınıstrliginiń Ekonomıkalyq taldaý bıýrosy mamyr aıymen salystyrǵanda maýsymda ıadrolyq otyn materıaldary ımportynyń eki esege jýyq azaıǵanyn kórsetetin esep jarııalady. Biraq Qazatomónerkásip ázirge mundaı aqparat almaǵan.
«Qazirgi ýaqytta «Qazatomónerkásip «UAK» AQ-qa Qazaqstannan AQSh-qa ýran jetkizýdi toqtata turý týraly belgisiz. AQSh-taǵy U3O8-di elder boıynsha satyp alý kózderiniń resmı statıstıkasy aı saıyn emes, jyl saıyn, jarty jylǵa keshiktirilip jarııalanady», - dep túsindirdi kompanııa.
Sondaı-aq, Qazatomónerkásip halyqaralyq arenada óz pozıtsııasyn nyǵaıta otyryp, amerıkalyq energetıkalyq kompanııalarmen únemi belsendi baılanysta bolatyny atap ótildi.
«Bul rette ýrandy satyp alý jıiligi bıýdjet nemese satyp alýshy eldegi qor sııaqty kóptegen faktorden quralady», - delingen kompanııa jaýabynda.
