Qazatomónerkásipte dron qurylǵysy keńinen qoldanylýda

ASTANA. QazAqparat - «Qazatomónerkásip» UAK» AQ basqarma tóraǵasy Asqar Jumaǵalıevtiń Honeywell Performance Materials and Technologies prezıdenti ári bas atqarýshy dırektory Radjıv Gýtammen kezdesýi barysynda kompanııalardyń óndiristi avtomattandyrý jáne tsıfrlandyrýǵa, kásiporyndar qyzmetine Indýstrıı 4.0. elementterin engizýge qatysty áriptestik múmkindikteri talqylandy, dep habarlaıdy kompanııanyń baspasóz qyzmeti.

Ulttyq atom kompanııasynyń basshysy Qazatomónerkásipte «Tsıfrly kenish» jobasynyń sátti engizilgenin málimdedi. Atalmysh joba josparlaýdy avtomattandyryp, ýranóndirýshi kásiporyndardyń tıimdiligin, standarttarǵa sáıkestigin arttyryp, negizgi jáne qosalqy protsessterdi eseptep baqylaýǵa tolyq múmkindik beredi.

Qazirgi kúni kompanııanyń enshiles kásiporyny «Qazatomónerkásip-SaUran» JShS-de daıyn ónimdi ydysqa salý jelisi robottandyrylýda, sonyń nátıjesinde operatsııalardyń barlyǵy qol eńbeginsiz júrgiziledi. Sondaı-aq, qazir kenishterde dron qurylǵysy keńinen paıdalanylýda. Onyń arqasynda tehnıka qaýipsizdiginiń saqtalýyn qadaǵalap, geotehnıkalyq polıgondardaǵy ahýaldy baqylaýǵa jáne basqa mańyzdy sharýaladry atqarýǵa bolady. 

Radjıv Gýtam óz kezeginde Qazatomónerkásip pen Honeywell Performance Materials and Technologies kompanııalary arasyndaǵy ekijaqty tıimdi áriptestikke belsendi qyzyǵýshylyǵyn, birlesken jobalardy iske asyryp, ozyq tájirıbemen almasýǵa daıyndyǵyn tanytty. 

Esterińizge sala ketsek, maýsym aıynda Qazatomónerkásip álemniń atom salasyndaǵy jetekshi kompanııalarymen óz birlesken kásiporyndarynda avtomattandyrý, tsıfrlandyrý, robottandyrý salasynda áriptestik ornatý boıynsha memorandýmdarǵa qol qoıǵan bolatyn.