«Qazatomónerkásip» AES qurylysynyń tehnıkalyq-ekonomıkalyq negizdemesin jasaýǵa kirisedi
Bul týraly búgin elordada ótip jatqan Azııadaǵy ıadrolyq kooperatsııalar forýmynyń mınıstrler deńgeıindegi 18-keńesi aıasynda BAQ ókilderine suhbat bergen QR Energetıka mınıstri Qanat Bozymbaev aıtty, dep habarlaıdy QazAqparat.
«Qazirgi ýaqytta Qazaqstanda elektr energııasynyń artyq kólemi baıqalady jáne elektr energııasyn óndirý qýatymyz búginde biz tutynatyn kólemnen 25-30 paıyzǵa artyq. Bizdiń boljamdy balansqa sáıkes, jańa qýattar 2025 jyldan keıin ǵana qajet bolýy yqtımal», - dedi ol.
Sonymen qatar ol Qazaqstan atom elektr stansasyn salý múmkinshiligine qatysty máseleler qazirgi ýaqytta jan-jaqty zerdelenip jatqandyǵyn basa aıtty.
«Aǵymdaǵy jyly «Qazatomónerkásip» ulttyq kompanııasy tehnıkalyq-ekonomıkalyq negizdesin ázirleýdi bastaýy tıis. Ózderińizde biletindeı, buǵan deıin belgili bir jumystar Kýrchatov ýchaskesinde júrgizilip, alań tańdap alyndy. Alaıda, ol kezde bul reseılik áriptestermen seriktestik negizinde júzege asyrylady jáne energııa Reseı Federatsııasyna satylady dep boljanǵan edi. Biraq, RF-nyń sibir energııa jelisiniń tutyný kóleminiń tómendeýine baılanysty bizdiń seriktester bul ıdeıadan bas tartty. Sondyqtan bul joba odan ary damyǵan joq. Endigi «Qazatomónerkásip» tehnıkalyq-ekonomıkalyq negizdemeni Qazaqstannyń qajettiligi úshin AES salý múmkinshiligin qarastyryp baryp jasaýy tıis. TEN qabyldanǵannan keıin Qazaqstanda stansanyń bolatyndyǵyn ne bolmaıtyndyǵyn anyqtaý jaıynda sóz qozǵaýǵa bolady. Osy ýaqytqa deıin qajet, qajet emes degen kóptegen mamandardyń, jalǵan mamandardyń pikirlerin kóp oqydym. Menińshe, ýaqytynan buryn bul jaıynda sóz qozǵaýdyń qajet joq», - dedi Qanat Bozymbaev.
Foto: ach.gov.ru
