KazAtomExpo-2024: Astanada atom energetıkasyndaǵy ozyq kompanııalar jınaldy
ASTANA. KAZINFORM – Búgin elordada ıadrolyq tehnologııalar men atom energetıkasyna arnalǵan KazAtomExpo halyqaralyq kórmesi ashyldy.
Onyń aıasynda Qazaqstannyń atom energetıkasy men ǵylym salasyndaǵy jetistikteri, sondaı-aq elimizdiń osy saladaǵy múmkindikteri tanystyryldy. Sonymen qatar, KazAtomExpo-2024-ke AES qurylysynda tájirıbesi mol álemdik jetekshi kompanııalar qatysyp jatyr.
Olardyń qatarynda «Qytaı ulttyq ıadrolyq korporatsııasy» (CNNC), «Koreıanyń sý jáne ıadrolyq energetıkalyq korporatsııasy» (KHNP), «Électricité de France» (EDF), sondaı-aq reseılik «Rosatom» memlekettik korporatsııasy bar. Bul kompanııalar ózderiniń ınnovatsııalyq jobalaryn tanystyryp, tájirıbelerimen jáne atom energetıkasyn damytý josparlaryn jarııa etti.
QR Energetıka mınıstri Almasadam Sátqalıev búgingi kórmeniń elimizdiń atom energetıkasyn damytýdaǵy mańyzdylyǵyn atap ótti.
«Ózderińiz biletindeı, bul kórme Qazaqstanda AES salý boıynsha jalpyulttyq respýblıkalyq referendým ótkizý qarsańynda ótip jatyr. KazAtomExpo kórmesi atom energetıkasyn damytýdyń mańyzdylyǵyn jáne energııanyń negizgi kózi retinde atom elektr stantsııalarynyń qajet ekenin jaqsyraq túsinýge múmkindik beredi. Bul múmkindikti bizge sheteldik áriptesterimiz, ıaǵnı ozyq ıadrolyq tehnologııalary bar elder usynyp otyr», - dedi mınıstr.
Vedomstvo basshysy elimiz kómirtegi beıtaraptyǵyna qol jetkizý úshin birqatar strategııalyq qujatty qabyldaǵanyn eske saldy. Bul qujattarda balamaly jáne «jasyl» energııa tehnologııalaryna ınvestıtsııany ulǵaıtýǵa, kómir óndirý úlesin kezeń-kezeńmen qysqartýǵa jáne 2060 jylǵa qaraı jańartylatyn energııa kózderi men balamaly energııa úlesin arttyrýǵa ekpin qoıylǵan.
Kórme barysynda plenarlyq otyrys ótip, sheteldik delegatsııalardyń basshylary sóz sóıledi. Olar QR Energetıka mınıstrimen kezdesý kezinde atom energııasyn beıbit maqsatta paıdalanýdy damytýdyń ózekti máselelerin talqylady.
Aıta keteıik, kórme aıasyndaǵy brıfıngide QR Energetıka mınıstrligi Atom energetıkasy jáne ónerkásibi departamentiniń dırektory Ǵumar Serǵazın Atom elektr stantsııasyn (AES) salyp beretin vendorǵa táýeldi bolyp qalmaý úshin ózimizdiń mamandardy daıarlaýǵa ekpin qoıylatynyn aıtty.
