Qazan qalasynda Abaıǵa bıýst ornatylady
«Oblysta 423 tarıhı jáne mádenı eskertkish bar. Olardyń 13-i respýblıkalyq, 410-y jergilikti mańyzy bar eskertkishter.
Byltyrdan beri 35 aýlany abattandyrý baǵytynda josparly jumys bastaldy. Bıyl taǵy 70 aýla aýmaǵyn, sondaı-aq 15 qoǵamdyq keńistikti abattandyrý josparlandy.
Olardyń birinde tatar aqyny Musa Jálelge bıýst ornatýdy kózdep otyrmyz. Sonymen birge Qazan qalasynda Abaıǵa arnap eskertkish (bıýst) ornatý josparlanǵan», - dedi Nurlan Uranhaev.
Sondaı-aq ákim qalany kógaldandyrý baǵdarlamasy qoǵamdyq demalys oryndaryn retke keltirýden bastalatynyn atap ótti.
«Jasyl jelekterdi kútý úshin jergilikti sýarý júıesiniń biryńǵaı shemasy jasalady. 60 shaqyrym joldy jóndeý josparlanýda, onyń aıasynda trotýarlar da jabdyqtalady.
Sondaı-aq qalanyń sáýlettik kelbetin retteýge, onyń arhıtektýralyq biregeıligin qalpyna keltirýge, neǵurlym birtekti tartymdy qalalyq ortany qurýǵa múmkindik beretin biryńǵaı dızaın kod qurý josparlanýda. Kóppáterli turǵyn úılerdiń qasbetterine jóndeý jumystary júrgizilýde.
Byltyr aspaly kópirdiń oń jaǵalaýyndaǵy kópirasty keńistigin paıdalanýǵa berdik.
Búginde ol balalar men jastardyń bos ýaqytyn tıimdi ótkizip, jınalatyn súıikti ornyna aınaldy. Bir aptadan soń, maýsym aıynyń 15-i kúni, dál osyndaı keńistik sol jaǵalaýda ashylady», - dedi aımaq basshysy.
Onyń aıtýynsha, Beıbitshilik aralyn abattandyrý jalǵasady.
«Kezinde bul jerde «balalar temirjoly» bolǵan. Bala kezimizde sol jerge baryp, serýendep qaıtatynbyz. Ókinishke qaraı, qazir ol joq. Sol sebepti, biz, aralda «Balalar temirjolyn» salamyz. Bul jer, sózsiz, balalarymyzdyń, taza tabıǵat aıasyndaǵy, eń súıikti demalys oryndarynyń biri bolady dep senemin.
Taǵy bir joba – Ertis jaǵalaýynan aralǵa aparar jaıaý júrginshiler kópiri. Ol qalamyzǵa kórik berýmen qatar, semeılikterdiń aralǵa baryp, tabıǵat aıasynda serýen qurýyna qolaıly jaǵdaı jasaıdy», - dedi Nurlan Uranhaev.
