Qazalyda soqqyǵa jyǵylǵan jasóspirimniń qal-jaǵdaıy týraly jalǵan aqparat tarady - basqarma

QYZYLORDA. QazAqparat – Qyzylordalyq dárigerler Qazalyda 5 oqýshy uryp-soqqan jasóspirimniń densaýlyq jaǵdaıyna baılanysty naqty málimet berdi, dep habarlaıdy QazAqparat tilshisi.

Qazaly aýdanynda jasóspirimder arasyndaǵy toptyq tóbeles saldarynan zardap shekken balanyń densaýlyǵyna baılanysty áleýmettik jelide túrli pikirler aıtylyp jatyr. Onyń ishinde balanyń jansaqtaý bóliminde es-tússiz jatqany jóninde aqparattar bar. Oblystyq densaýlyq saqtaý basqarmasy turǵyndardan jalǵan aqparat taratpaýdy, tek qana resmı quzyrly mekemeler málimetine júginýdi suraıdy. 9 sáýir saǵat 19:00-degi málimet boıynsha jasóspirimniń jaǵdaıy turaqty aýyr. Dınamıkada asqynýsyz, jaqsaryp keledi. Esin anyq biledi, suraqtarǵa jaýap beredi. Azdaǵan bas aýrýyna shaǵymdanady, jalpy álsizdik basym. Dene qyzýy qalypty. Laboratorlyq zertteýlerde aıtarlyqtaı ózgeris joq. Oblystyq kópbeıindi balalar aýrýhanasy dárigerlerinen turaqty keńes alynyp otyr. Emine korrektsııa jasalyp jatyr

, - dep málim etti oblystyq densaýlyq saqtaý basqarmasynan.

Eske salsaq, 6 sáýirde saǵat 16:00 shamasynda Qyzylorda oblysy Qazaly aýdanynda 15 jastaǵy jasóspirim jedel járdem brıgadasymen aýdandyq kópbeıindi ortalyq aýrýhanaǵa jetkizilgen.

Áleýmettik jelide jasóspirimdi áldekimderdiń uryp-soqqan vıdeosy jarııalanǵan edi. Osyǵan baılanysty Qazaly aýdandyq polıtsııa bólimi qosymsha tekserý jáne áleýmettik jelilerde monıtorıng júrgizdi. Jasóspirimdi uryp-soqqan 5 oqýshy anyqtaldy.