Qazaqy tazylar alǵash ret álemdik kórmege qatysady

ASTANA. QazAqparat – Bıyl 21-23 tamyz kúnderi Jenevada Halyqaralyq kınologııa federatsııasy (FCI) Bas assambleıasynyń otyrysy ótedi. Onyń aıasynda uıymdastyrylatyn «World Dog Show-2023» ıtter kórmesine Qazaqstannan eki tazy qatysady, dep habarlaıdy QazAqparat.

Qazaqstan kınologtary odaǵynan málim etkendeı, qazaqy tazylar mundaı dúnıejúzilik chempıonatqa tarıhta tuńǵysh ret qatysqaly otyr. Oǵan elimizdiń tóltýma ıt tuqymdaryn halyqaralyq arenaǵa tanytý jumystaryn belsendi júrgizip kele jatqan Qazaqstan kınologtary odaǵy muryndyq bolǵan.

Shveıtsarııa Ulttyq kınologııalyq qoǵamy Qazaqstan kınologtary odaǵynyń ótinishin qarastyra kelip, tazyny Jenevada ótetin Álem chempıonatyna qatysatyn ıt tuqymdarynyń tizimine qosty.

Qazaqy tazy tarıhta alǵash ret Eýropalyq odaq elderiniń dúnıejúzilik kórmesine qatysatyn boldy. Osy jolda úlken jumys atqaryldy. Biz Belgııadaǵy FCI-men arada (Halyqaralyq kınologııalyq federatsııa) birqatar kelissóz júrgizdik. Bıyl sáýir aıynda Qazaqstan kınologtary odaǵynyń ótinishi boıynsha, «Kazakh Tazy» tuńǵysh ret Halyqaralyq kınologııa federatsııasynda ıt tuqymdarynyń nomenklatýralyq tizimine engizildi. Bizdiń usynysymyz FCI tarapynan qoldaý tapqanyna óte qýanyshtymyz

, – deıdi Qazaqstan kınologtary odaǵynyń prezıdenti Baýyrjan Serikqalı.

Sondaı-aq 21-22 tamyz kúnderi ótetin Halyqaralyq kınologııa federatsııasynyń bas assambleıasynda Qazaqstandy osy uıymnyń tolyq quqyly múshesi retinde taný máselesi qarastyrylatyny aıtylyp otyr.

Aıta keteıik, 2022 jyly Memleket basshysy Qasym-Jomart Toqaev tıisti organdarǵa ulttyq ıt tuqymdary – qazaqy tazy men tóbetti saqtaý jáne qalpyna keltirý, sondaı-aq ony tóltýma qazaqy ıt tuqymdary retinde halyqaralyq deńgeıde tanytýdy tapsyrǵan bolatyn. Bul máseleni QR Prezıdenti Іs basqarmasy óz qaraýyna alyp, júıeli sheshim qabldaý úshin memlekettik organdar jumysyn úılestirýmen aınalysty. Prezıdent tapsyrmasy boıynsha tıisti jumys toby qurylyp, Ekologııa jáne tabıǵı resýrstar mınıstrligi ókiletti organ retinde aıqyndaldy.

Qazaqy tazy men tóbet tuqymdaryn halyqaralyq arenada tanytý úshin shtab-páteri Belgııada ornalasqan Halyqaralyq kınologııa federatsııasyna ótinish jiberildi. Basty talap – elimizdiń Kınologııa qaýymdastyǵyn osy uıymnyń tolyq quqyly múshesi retinde tirkeý. Elimizdiń atynan FCI-men arada Qazaqstan kınologtary odaǵy qarym-qatynas júrgizedi.