Qazaqtyń ulttyq medıtsınasymen aınalysatyn dáriger Qytaıda úzdikter qatarynan kórindi — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Qorǵasta halyqaralyq taýarlyq saýda kórmesi ótedi — Harajorga
4-6 shilde aralyǵynda Qorǵas qalasynda «Ortalyq Azııanyń ereksheligi, Qorǵastaǵy iskerlik múmkindikter» taqyrybymen Ortalyq Azııa (Qorǵas) taýarlyq saýda kórmesi ótedi, dep habarlaıdy qytaılyq Harajorga basylymy.
Atalǵan kórme qarjy qosý yntymaqtastyǵy, Qytaı taýarlary jáne Ortalyq Azııa taýarlary syndy úsh negizgi taqyryptyq joba boıynsha josparlanyp otyr.
Munda ınvestıtsııa jáne yntymaqtastyq, toqyma buıymdar, kıim-keshek, aýylsharýashylyq ónimderi men azyq-túlik, elektromehanıkalyq jabdyqtar jáne transshekaralyq logıstıka sııaqty 10-nan astam negizgi sala qamtylady.
Onyń ishinde Qytaı (Shyńjań) pılottyq erkin saýda aımaǵynyń Qorǵas aımaǵyn joǵary sapaly damytý sammıti forýmy jáne Ortalyq Azııa aýylsharýashylyq ónimderin jetkizý tizbegi yntymaqtastyǵy sammıti sııaqty 20-dan astam qoldaý sharalary bir ýaqytta ótedi.
Qytaılyq BAQ-tyń habarlaýynsha, Saýda mınıstrliginde tirkelgen ulttyq deńgeıdegi bul mańyzdy kórme — Qytaı men Ortalyq Azııanyń bes eliniń ekonomıkalyq jáne saýda yntymaqtastyǵyn tereńdetý. Sondaı-aq «Bir beldeý, bir jol» halyqaralyq jobasyn damytýdy kózdeıdi.
Memleket basshylarynyń dıplomatııalyq strategııasy men Qytaı-Ortalyq Azııa yntymaqtastyǵy mehanızmin ilgeriletý boıynsha Shyńjań Jibek joly ekonomıkalyq beldeýiniń negizgi aımaǵy retindegi artyqshylyqtaryn keńeıtýdi jalǵastyrýda. Qytaı eli Ortalyq Azııa men Eýropany baılanystyratyn «altyn porty» retinde Qorǵas óziniń saıası artyqshylyqtarynyń arqasynda halyqaralyq saýda jáne logıstıkalyq habqa aınaldy, dep jazady qytaılyq BAQ.
Tashkent tórindegi tarıhı jıyn: Parlamentaralyq Odaqtyń 150-assambleıasy óz máresine jetti — ÓzA
Ótken aptada, atap aıtqanda 2025 jyldyń 5–9 sáýiri aralyǵynda Tashkent shahary dúnıe júziniń nazaryna ilikti. Sebebi bul kúnderi Ózbekstan astanasynda Parlamentaralyq odaqtyń 150 jyldyǵyna arnalǵan mereıtoılyq Assambleıa ótti. Osy mańyzdy sharanyń qorytyndysy jaıly ÓzA agenttiginiń tilshisi Parlamentaralyq odaqtyń Prezıdenti Týlııa Eksonmen suhbattasqan.
Uıym basshysynyń óz sózinshe, mereıtoılyq Assambleıanyń Ózbekstanda ótýi ózbekstandyqtar úshin zor mártebe. Sondaı-aq, ol bul jıynda ózderiniń mol tájirıbe jınaǵanyn, jańa ıdeıalarǵa jol ashylǵanyn tilge tıek etken.
Sonymen qatar, Ózbekstan Respýblıkasynyń Prezıdenti baıandama jasaǵany aıtylady.
Ózbekstandyq BAQ-tyń dereginshe, assambleıa aıasynda qabyldanǵan Tashkent deklaratsııasy — aıtýly qujat. Ol jınalǵandar tarapynan zor qoshemetke ıe boldy. Bul qujatta turaqty damý maqsattary, áleýmettik progress, áıelder men jastardyń qoǵamdaǵy orny, genderlik teńdik sııaqty ózekti máseleler qamtylǵan.
Sondaı-aq osy aptada «ÓzA» aqparat agenttigi «KAZINFORM»-ǵa silteme jasap «Qazaqstan men Ózbekstan aqparat salasynda áriptestikti nyǵaıtýǵa kelisti» degen taqyryptaǵy aqparat jarııalandy.
Astana qalasynda ótken ІІ Ortalyq Azııa medıaforýmy aıasynda Qazaqstan men Ózbekstan ekijaqty hattamaǵa qol qoıǵan bolatyn.
Esterińizge sala keteıik, Mádenıet jáne aqparat mınıstri Aıda Balaeva Ózbekstan Respýblıkasy Prezıdenti Ákimshiliginiń janyndaǵy Aqparat jáne buqaralyq kommýnıkatsııalar agenttiginiń dırektory Asadjon Hodjaevpen kezdesip, Qazaqstannyń Ortalyq Azııa óńirinde biryńǵaı aqparattyq keńistikti nyǵaıtýdy únemi qoldaıtynyn atap ótti.
Aıta keteıik, Astanada ótken ІІ Ortalyq Azııa medıaforýǵa Qazaqstan, Ózbekstan, Qyrǵyzstan, Ázerbaıjan, Tájikstan, Túrikmenstan, Ulybrıtanııa, Qytaı, Qatar, Reseı jáne basqa da elderden 700-den astam delegat qatysqan bolatyn.
Sondaı-aq taraptar arasyndaǵy yntymaqtastyqty keńeıtý jáne ózara tájirıbelik baılanysty damytý maqsatynda aqparattyq saladaǵy áriptestikti nyǵaıtýǵa baǵyttalǵan birlesken hattamaǵa qol qoıyldy.
Endi Qytaı men Qazaqstannyń jemis-kókónisterin tikeleı satyp alýǵa boldy
— «Halyq gazeti»
Jaqynda Shyńjańdaǵy eń iri jemis-kókónis kóterme saýda naryǵy men Qazaqstannyń jemis-kókónis naryǵy alǵash ret tikeleı birlesken jetkizý júıesin iske asyryp, eki el arasyndaǵy eksporttyq qyzmettiń jańa modelin synaqtan ótkizdi.
Bul týraly osy aptada Qytaıdyń «Halyq gazeti» basylymy habarlady.
Atalǵan BAQ-tyń dereginshe, yntymaqtastyqtyń jańa modeline sáıkes, Shyńjań Tszıýdın saýda-logıstıkalyq tobynyń jemis-kókónis kóterme saýda naryǵynda jemister men kókónis ónimderi tıelgen transshekaralyq tońazytqysh tizbekti júk kólikteri TIR (halyqaralyq avtomobıl kóligi) júıesi arqyly shekaradan ótedi.
Keltirilgen derekterge súıensek, TIR halyqaralyq avtomobıl kóligi júıesiniń «bir jolda tekserý, jol boıy toqtaýsyz» júre beretin artyqshylyqtary arqasynda Qytaı-Qazaqstan shekarasynda sandyqty ekinshi ret ashyp teksermeı-aq óte alady, bul tekserý ýaqytyn 60%-ǵa qysqartty. Tasymaldaý ýaqyty kem degende 12 saǵat únemdeldi.
«Keri qaıtar jolda júk kólikteri Qazaqstanda óndirilgen zyǵyr maıyn, baldy, sıyr men qoı etin tıep keledi. Osylaısha, eki baǵytta birlesken jetkizý júzege asyp, Qytaı men Qazaqstan ózara ıgilikke qol jetkizip jatyr» dep jazady qytaılyq basylym.
Sondaı-aq osy aptada Qytaıdyń Halyq gazeti basylymynda «Qytaıdyń V halyqaralyq tutyný taýarlary kórmesine álemdegi eń úzdik ónimder qoıyldy» degen taqyryptaǵy aqparat jaryq kórgen bolatyn.
Atalǵan BAQ-tyń dereginshe, 13 sáýirde Haınan ólkesi Haıkoý qalasynda Qytaıdyń V halyqaralyq tutyný taýarlary kórmesi ashyldy. Onda adam pishinindegi robot podıýmdary, ıntellektýaldy drondar, sándi kólikter, zergerlik buıymdar qoıylǵan.
Bul kórmege álemniń 71 eli men aımaǵynan 4100-den astam tutynýshy brendteri keldi. Olar sándik, jańa tehnologııa, salaýattylyq, ekologııalyq tutyný, tómen keńistiktegi ekonomıka, ıahta ekonomıkasy jáne basqa da halyq arasynda tanymal tutyný túrlerinen turady.
«Saadı baǵy» — álem ádebıetiniń eń úzdik aýdarylǵan týyndysy atandy — ParsToday
Dúısenbi kúni Saraevo halyqaralyq kitap kórmesiniń sońǵy kúnine sáıkes, jármeńkeniń tańdamaly jumystary 18 bólim boıynsha anyqtalyp, tanystyryldy, dep jazdy ParsToday aqparat agenttigi.
Atalǵan basylymnyń habarlaýynsha, 36-shy Saraevo halyqaralyq kitap kórmesinde álem ádebıetiniń bosnııalyq, serb, horvat jáne kerisinshe tilderine eń jaqsy aýdarylǵan týyndysy úshin syılyq «Saadıdiń baǵy» dep aýdarylǵan kitapqa berildi.
Bosnııa jáne Gertsegovınadaǵy Irannyń mádenı ortalyǵy men osy eldiń Dýbraknıka baspasynyń yntymaqtastyǵymen jáne Iran Islam mádenıeti men baılanystary uıymynyń Islamdyq bilim jáne gýmanıtarlyq ǵylymdardy aýdarý jáne basyp shyǵarýdy uıymdastyrý ortalyǵynyń qoldaýymen bosnııalyq tiline aýdarylǵan bul halyqaralyq kitap kórmesinde alǵash ret tanystyryldy. Iran ádebıetiniń bul tamasha týyndysyn Mýammar Kýdrıch aýdarǵan.
Irandyq BAQ-tyń dereginshe, Mýmbaıdaǵy Iran Islam Respýblıkasynyń Mádenıet úıi «Karvan Ordý» úkimettik emes uıymy jáne «Islam Ǵymhana» mádenı keshenimen birlesip, 21 sáýirde Saadıdi eske alý kúni men Parsy prozasy kúnine oraı «Saadı Shırazı» taqyrybynda konferentsııa ótkizbek.
Aıta keteıik, Saadı degen atpen belgili Ábý Muhammad Mýsharraf ad-Dın Mýsleh ıbn Abdýlla ıbn Mýsharraf hıjranyń 7 ǵasyryndaǵy ırandyq aqyn ári jazýshy.
Qazaqtyń ulttyq medıtsınasymen aınalysatyn dáriger memlekettik úzdikter qatarynan kórindi — Harajorga
2024 jylǵy «Qytaı materıaldyq emes mádenı muralar jyldyq tulǵasynan» 100 kandıdattyń atyn atady. Shyńjańnan 3 adam tańdaldy, dep habarlaıdy Harajorga.
Qytaılyq BAQ-tyń dereginshe, 16 sáýir kúni 2024 jylǵy «Qytaı materıaldyq emes mádenı muralary jyldyq tulǵasyn» korsetý, túsindirý is-sharasy 100 adamnyń esimin jarııalady. Atalǵan sharaǵa oraı Shyńjańdaǵy materıaldyq emes mádenı muralary salasynan 3 adam murager retinde tańdaldy. Solardyń biri memleket dárejeli materıaldyq emes mádenı mura retinde qazaqtyń ulttyq shıpagerliginiń (býlap emdeý, súıek otashylyǵy, úsikti emdeý) memleket dárejeli ókildik murageri Baqytbek Qumarqajyuly boldy.
«Qytaı materıaldyq emes mádenı muralar jyldyq tulǵasyn» kórsetý, tanystyrý jumystary 2017 jyldan beri 7 ret ótkizilip, materıaldyq emes mádenı mura tulǵalarynyń izgi isterin kórsetý jáne jańǵyrtý arqyly ony qazirgi qoǵammen tikeleı aralasý arqyly halyqtyń ómirine qyzmet óteýin ilgeriletken.
Bul is-sharany Mádenıet jáne týrızm mınıstrliginiń materıaldyq emes mádenı muralar mekemesiniń jetekshiliginde Gýanmın gazeti uıymdastyrǵan. Olardyń negizgi baǵyty — el ishindegi materıaldyq emes mádenı muralardyń ókildik muragerleri, atalǵan saladaǵy jobalaýshylar, kásipkerler, óner ókilderi, materıaldyq emes mádenı muralardy basqarýshylar qatarlylardy kótermeleý. Kelesi qadamda joǵarydaǵy memleket boıynsha tańdalǵan 100 kandıdattyń ishinen 30-yn iriktep, sońǵy baǵalaýǵa qatystyryp, eń sońynda úzdikterin saılaıtyny aıtylady.
DDSU-ǵa múshe elder bolashaqta pandemııamen kúresý úshin tarıhı kelisimge keldi — TRT
COVID-19 pandemııasy álemdik densaýlyq saqtaý júıesiniń mańyzdy olqylyqtaryn jaryqqa shyǵarǵaly bes jyl ótti. DDSU-ǵa múshe elder jańa jahandyq pandemııaǵa daıyndyq aıasynda teńdik, tehnologııalardy bólisý jáne yntymaqtastyq sııaqty máselelerdi qarastyratyn 32 bettik kelisimge keldi.
Bul týraly Túrkııa Radıo Televızııa portaly habarlady.
Atalǵan BAQ-tyń keltirgen málimetterine súıensek, úsh jylǵa sozylǵan kelissóz nátıjesinde elder bolashaq pandemııalarmen kúresý joldaryn anyqtaıtyn mańyzdy kelisim mátinine qol jetkizdi. Bul kelisim Covid-19 daǵdarysy kezinde jiberilgen qatelikterdi qaıtalamaýǵa baǵyttalǵan.
— Búgingi tún qaýipsiz álemge qaraı ortaq saparymyzdaǵy mańyzdy kezeńdi bildiredi. Búgin Jenevada álem elderi tarıh jazdy, — dedi DDSU basshysy Tedros Adhanom Gebreıesýs.
Kelissózder COVID-19 mıllıondaǵan adamdy óltirip, ekonomıkany quldyratqannan bes jyldan keıin qus tumaýy (H5N1), qyzylsha, Mpoks jáne Ebola sııaqty jańa qaýipterden keıin júrgizildi.
«Kelissózderdiń sońǵy kezeńi AQSh-tyń syrtqy kómekti qysqartýymen jáne dári-dármekterge tarıfterdiń kóterilýine baılanysty keıinge qalǵan bolatyn», dep jazady túrkııalyq BAQ.