«Qazaqtaný» jobasy boıynsha respýblıkalyq lektorıı Qyzylordadan bastaldy
Saltanatty ashqan oblys ákiminiń orynbasary Rýslan Rústemov jalpyulttyq birliktiń qazaqstandyq úlgisin nyǵaıtýda atalmysh jobanyń mańyzdylyǵyna basa nazar aýdardy. Al QHA Tóraǵasynyń orynbasary-Hatshylyq meńgerýshisi Leonıd Prokopenko atalmysh jobanyń mańyzy men maqsaty jaıynda keńinen baıandap berdi. Atalmysh joba qazaq halqynyń etnostary, gýmanıstik dástúrler men rýhanı baılyǵy negizinde qoǵamdyq kelisim men jalpyulttyq birlikti biriktirý maqsatyna baǵyttalǵan.
«Sondaı-aq, túrli etnostyq toptardyń ókilderine qazaq halqynyń tarıhy, dástúrleri, mádenıeti, dini, rýhanı ortalyqtary, turmys salty tanystyrylady. Taǵy bir ereksheligi, urpaq arasyndaǵy baılanystardyń, birliktiń negizgi prıntsıpteri men kelisimniń, etnıkalyq toleranttylyqtyń negizinde birigýi men damýyna nazar aýdarylady. Joba jalpyqazaqstandyq qundylyq pen qazaqstandyq patrıotızmdi biriktirý men qalyptastyrý bolyp tabylady», - dedi L.Prokopenko.
Belgili ádebıet zertteýshisi, ǵalym Qulbek Ergóbek qazaq halqynyń shejireli tarıhynda Syr óńiriniń alatyn orny erekshe ekenine toqtaldy. Darııa boıy - Alash balasyna jaýshylyqta pana, jaıshylyqta ana bola bilgen qasıetti óńir. Sondyqtan «Qazaqtaný» jobasy boıynsha ıgilikti isterdiń Qyzylorda oblysynan bastaý alýy óte quptarlyq. Bul jobaǵa árbir azamat úlken úles qosqany artyq emes. Árbir janashyr azamat ólketaný máselesine nazar aýdarsa, san alýan tarıhı qazynamyzdy túgendeýge jol ashylar edi.
«Qazaqta «Otan otbasynan bastalady» degen naqyl sóz bar. Biz týǵan jerdiń tarıhyn tanýymyz qajet. Syr boıy - arheologııalyq dúnıelerge baı ólke. Burynǵy jyldarda darııanyń bastapqy aǵysyndaǵy qanshama qundylyqtar zerdeli zertteýden ótkizildi. Qazir oblys basshylyǵynyń qoldaýymen Syrdarııanyń orta tusyndaǵy aýmaqtaǵy osyndaı qazynalar tarazylanyp jatyr. Al tómengi bóliginde qanshama arheologııalyq kenishter bar ekenin esimizden shyǵarmaýymyz tıis», - dedi Q.Ergóbek.
Jazýshy, qoǵam qaıratkeri Myrzageldi Kemel bizdiń ultymyz ejelden baýyrmal qasıetimen daralanyp turǵanyn tilge tıek etti. Ol kisiniń aıtýynsha, qazaq qashanda jabyrqaǵannyń janynan tabyldy, jyǵylǵanǵa súıeý boldy. Keshegi kezeńde taǵdyr jazýymen qazaq topyraǵyna qadam basqan san túrli etnos ókilderiniń júzindegi jasty súrtip, olarǵa úlken qamqorlyq kórsetti.
«Qasıetti Qazaqstan» ǵylymı-zertteý ortalyǵynyń basshysy Berik Ábdiǵalıuly ótken tarıhymyzǵa óz deńgeıinde nazar aýdarý qajettigine mańyz berdi. Bul oraıda qazaq handaryna óńirlerden eńseli eskertkish ornatýdyń mańyzy zor. Alash zııalylaryn qurmetteýde Syr óńiri ıgi isti qolǵa alyp, alǵashqylar qatarynda tuǵyrly tulǵamyz Mustafa Shoqaıǵa eskertkish ornatty. Budan keıin elimizdiń ózge óńirlerinde ózge de alash qaıratkerlerine arnalǵan eskertkishter boı kóterdi.
Respýblıkalyq «Aıqyn» gazetiniń bas redaktory Nurtóre Júsip qazaqty tanýda «Qazaqtaný» jobasynyń mańyzy erekshe ekenine nazar aýdartsa, jazýshy, aýdarmashy Kamal Álpeıisova ulttyq qundylyqtarǵa baılanysty oı-pikirimen bólisti.
Búgin, 12 qyrkúıekte Qyzylorda qalasynyń joǵary oqý oryndary men Shıeli aýdanynda, 13 qyrkúıekte Syrdarııa, Qarmaqshy aýdandary men Baıqońyr qalasynda «Qazaqtaný» jobasyna arnalǵan dárister oqylady. Lektorıı sheńberinde 2 kún boıy kásibı emes medıatorlarǵa arnalǵan trenıngter, «Meniń jetistigimniń tarıhy - el jetistiginiń tarıhy» taqyrybynda shyǵarmashylyq kesh bolady. Sondaı-aq, Qyzylorda oblystyq assambleıasynyń ǵylymı-sarapshylyq tobynyń keńeıtilgen otyrysy ótedi.
