Qazaqstannyń Joǵarǵy Soty saılaý quqyqtaryn qorǵaıtyn zań jobasyn ázirleýde
Bul týraly búgin Parlament Senatynda «Qazirgi zamanǵy parlamentarızm: qalyptasýy, damýy jáne zań shyǵarý protsesinde bılik tarmaqtary arasyndaǵy ózara is-qımyldy jetildirý» taqyrybynda ótken halyqaralyq konferentsııada málim boldy.
QR Joǵarǵy Sotynyń tóraǵasy Bektas Beknazarovtyń aıtýynsha, sot bıligi aldaǵy ýaqytta da Parlamentpen birlesip qoǵamdyq ómirdiń ártúrli salalaryn damytýǵa qajetti zańdardyń daıyndalýyna, qabyldanýyna qatysýdy josparlaıdy. Máselen, Úkimettiń 2013 jylǵy zań jobalaý jumystarynyń josparyna sáıkes, Joǵarǵy Sot tórt zań jobasyn daıyndaý jumystaryn júrgizip jatyr.
«Atap aıtsaq, «Qazaqstan Respýblıkasyndaǵy saılaý týraly» konstıtýtsııalyq zańǵa ózgerister men tolyqtyrýlar engizý týraly» zań jobasy ázirlenýde. Onda saılaý quqyqtaryn qorǵaý týraly isterge qatysty sot sheshimderine appellıatsııalyq tártippen shaǵymdaný ınstıtýtyn engizý máselesi qarastyrylady. Budan bólek osy sanattaǵy isterdiń merzimderin sáıkestendirý normalary eskeriledi. Bunymen qosa, zań jobasy saılaý quqyqtaryn qorǵaý týraly aryz bergen talapkerlerdi memlekettik baj salyǵynan bosatý máselesin de qamtıtyn bolady», - dedi B. Beknazarov.
Tóraǵanyń aıtýyna qaraǵanda, aldaǵy ýaqytta «Qazaqstan Respýblıkasynyń sot júıesi men sýdıalarynyń mártebesi týraly» konstıtýtsııalyq zańǵa ózgerister men tolyqtyrýlar engizý týraly» zań jobasy da Parlamentke usynylady. Onda sýdıalyq laýazymǵa kandıdattardy irikteý konkýrsy rásimin jetildirý kózdeledi.
