Qazaqstannyń «jasyl» ınvestıtsııalardaǵy róli artyp keledi

ASTANA. QazAqparat – Qazaqstannyń «jasyl» ınvestıtsııalardaǵy róli artyp keledi. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«ESG (ekologııa, áleýmettik saıasat jáne korporatıvtik basqarý) kún tártibin eskere otyryp, álemdik keńistikte «jasyl» ınvestıtsııalardyń róli artyp keledi. Bir qyzyǵy, bul baǵytta Qazaqstannyń da róli artýda. Birqatar jobany iske asyrý elimizge «jasyl» sýteginiń álemdik top-10 óndirýshileriniń qataryna kirýge múmkindik beredi. Atap aıtqanda, osy jyldyń qazan aıynda Svevind nemis-shved kompanııasy Qazaqstan Úkimetimen jobalyq qýaty 20 GVt «jasyl» sýtek óndirý zaýytyn salý týraly kelisimge qol qoıdy. Quny 50 mlrd dollar turatyn bul joba jylyna 2 mln tonnaǵa deıin «jasyl» sýtegi óndirýge múmkindik beredi», - dedi ol mınıstrliktiń osy jylǵy jumysyn qorytyndylaýǵa arnalǵan baspasóz máslıhatynda.

Onyń atap ótýinshe, Mysyrda ótken COP27 jahandyq konferentsııasynda Qazaqstan Úkimeti men Fortessue aýstralııalyq kompanııasy arasynda elimizde «jasyl» sýtegi óndirý jobalaryn iske asyrý týraly kelisimge qol jetkizildi.

Memleket basshysynyń Parıjge sapary aıasynda QR Energetıka mınıstri Bolat Aqsholaqov Frantsııa úkimetimen «Jahandyq jylynýǵa qarsy kúres salasyndaǵy yntymaqtastyqty iske asyrý týraly» arnaıy kelisimge qol qoıdy.

«Osy qujattyń tarmaqtarynyń biri - Jambyl oblysynda qýaty 300-600 MVt saǵ energııa jınaqtaý júıesi bar qýaty 1 GVt jel elektr stantsııasyn salý. Jobany Total Eren jáne «Samuryq-Qazyna» AQ júzege asyrady», - dedi Aıbek Smadııarov.

Foto:cefic.org