Qazaqstannyń Úshinshi jańǵyrýy: Mınıstrler atqarylǵan jumystar boıynsha esep berdi

ASTANA. QazAqparat - QR Premer-Mınıstri Baqytjan Saǵyntaev Úkimet úıinde beınekonferentsııa baılanysy rejıminde Qazaqstannyń Úshinshi jańǵyrýyn jobalyq basqarý aıasynda atqarylǵan jumystardyń jaı-kúıi jóninde keńes ótkizdi, dep habarlaıdy QazAqparat primeminister.kz saıtyna silteme jasap.

Keńes barysynda ekonomıka salalaryn tsıfrlandyrý jáne aqparattyq-kommýnıkatsııalyq tehnologııalardy, otyn-energetıkalyq keshendi, ındýstrııalandyrýdy, kólik jáne logıstıkany damytý, sondaı-aq  tehnologııalyq jańǵyrtý men ınvestıtsııalardy tartý máseleleri boıynsha 9 aıdaǵy aldyn ala esepter, 2018 jyldyń sońyna deıingi josparlar talqylandy.

Beınekonferentsııa rejıminde Ulttyq ekonomıka mınıstri T. Súleımenovtyń, Investıtsııalar jáne damý mınıstri J. Qasymbektiń, Aqparat jáne kommýnıkatsııalar mınıstri D. Abaevtyń jáne Energetıka vıtse-mınıstri B. Aqsholaqovtyń baıandamalary tyńdaldy.

Sonymen qatar keńes barysynda Premer-Mınıstrdiń orynbasarlary E. Dosaev pen A. Jumaǵalıev sóz sóıledi.