Qazaqstannyń UNESCO jáne ISESCO isteri jónindegi ulttyq komıssııasynyń otyrysy ótti

NUR-SULTAN. QazAqparat - QR Ulttyq akademııalyq kitaphanasynda QR Mádenıet jáne sport mınıstri Aqtoty Raıymqulovanyń tóraǵalyǵymen UNESCO jáne ISESCO (Bilim, ǵylym jáne mádenıet jónindegi Islam uıymy) isteri jónindegi ulttyq komıssııanyń kezekti otyrysy ótti, dep habarlaıdy QazAqparat QR SІM saıtyna silteme jasap.

Otyrysqa komıssııanyń turaqty músheleri – múddeli memlekettik organdardyń basshylary, Qazaqstannyń bilim, ǵylym jáne mádenıet qaıratkerleri qatysty.

Sońǵy eki jyldyń qorytyndysy boıynsha komıssııa, onyń taqyryptyq komıtetteri men UNESCO klýbtary jáne UNESCO-nyń qaýymdasqan mektepteriniń jumystarynyń naqty nátıjesi baıandaldy. Atap aıtqanda, Qazaqstannyń taǵy eki ulttyq parki – Sharyn jáne Jońǵar Alataýy UNESCO-nyń dúnıejúzilik bıosferalyq rezervattar jelisine engizildi. Adamzattyń materıaldyq emes mádenı murasynyń reprezentatıvtik tizimi Qazaqstannyń «Qorqyt murasy» jáne «Qazaq jylqy ósirýshileriniń dástúrli kóktemgi ádet-ǵuryptary – Qymyzmuryndyq, bıe baılaý jáne aıǵyr qosý» nomınatsııalarymen tolyqtyrdy.

UNESCO-nyń qoldaýymen Parıj qalasynda «Uly dala: rýhanı mura jáne onyń álemdik tarıhqa úlesi» halyqaralyq forým sátti ótkizildi.

Qazaqstan UNESCO-nyń «Adam jáne bıosfera» baǵdarlamasynyń halyqaralyq úılestirý keńesine taǵaıyndaldy, al Qazaqstandyq salalyq ulttyq komıtetiniń basshysy R. ıAşenko bıosferalyq rezervattar jónindegi Keńesshilerdiń halyqaralyq komıtetiniń quramyna taǵaıyndaldy.

QR Syrtqy ister mınıstriniń orynbasary – Ulttyq komıssııa tóraǵasynyń orynbasary E.Ashyqbaev UNESCO-nyń Áleýmettik-mádenı saladaǵy mindetterdi sheshýde Qazaqstannyń mańyzdy seriktesi bolyp qala beretinin, sondaı-aq mádenıet, ǵylym, bilim, aqparattyq tehnologııalar salalaryndaǵy ulttyq jetistikterdi nasıhattaý úshin biregeı platforma bolyp tabylatynyn atap ótti.

Otyrys barysynda qatysýshylar komıssııanyń 2020 jylǵa arnalǵan qyzmetiniń basym baǵyttaryn talqylady, onyń ishinde UNESCO-nyń dúnıejúzilik mura jáne materıaldyq emes mura tizimine jańa ulttyq nomınatsııalardy daıyndaý jáne ilgerletý máselelerin qarastyrdy.

Komıssııa músheleri bıyl UNESCO-nyń ataýly datalar kúntizbesine engizilgen Ál-Farabıdiń 1150 jyldyǵy men Shymkenttiń 2200 jyldyǵyn atap ótýdi máselesin talqylaýǵa erekshe nazar aýdardy.