Qazaqstannyń sý resýrstarynyń mólsheri aıtarlyqtaı tómendegen
Atalmysh másele Seýlde ótken arnaıy semınarda talqylandy. Onda Ortalyq Azııa elderiniń Energetıka jáne aýyl sharýashylyǵy mınıstrlikteriniń ókilderi bas qosty. Semınardy «Ortalyq Azııa-Koreıa Respýblıkasy» yntymaqtastyq forýmynyń hatshylyǵy uıymdastyrdy.
«Qazgıdromet» RMK bas dırektorynyń orynbasary Danara Álimbaevanyń jasaǵan baıandamasyna sáıkes, Qazaqstanda sońǵy 100 jyl ishinde aýa temperatýrasy 1,37 gradýsqa deıin joǵarylaǵan. Al ǵalymdardyń aıtýynsha, bul kórsetkish 2050 jylǵa deıin 4 gradýsqa deıin kóterilýi múmkin. Eldiń sý resýrastarynyń mólsheri sońǵy 40 jyl ishinde 115-ten 91 tekshe shaqyrymǵa deıin túsip ketken. Al Qazaqstan jerleriniń 76 paıyzy shólge aınalǵan.
«Bizdiń gıdrolog mamandar bizdegi ózen aǵyny 2020 jylǵa deıin 81 tekshe shaqyrymǵa, al 2030 jylǵa qaraı 72 tekshe metrge jetetininin anyqtady. Al memlekettik tutyný deńgeıiniń normasy 88 tekshe shaqyrymnan aspaýy tıis. Qazirdiń ózinde sý jetispeı jatsa, 20 jyldan keıin Qazaqstanda múlde tapshy bolaıyn dep tur», - dedi Dınara Álimbaeva.
Koreıanyń klımat ózgerýin zertteıtin qoǵamnyń basshysy Lı Vý Kıýn ekologııalyq máselelerdi klımatty ózgertý mamandaryn daıyndaý jáne kadrlardy almastyrý arqyly sheshýge bolatynyn jetkizdi.
«Ortalyq Azııa elderiniń, onyń ishinde Qazaqstannyń klımaty - qurǵaq. 60-jyldary Koreıadaǵy ormandardyń jetispeýshiligine baılanysty qurǵaqshylyqtan aıtarlyqtaı zardap shekken edik. Osy máseleniń sheshimin tabý úshin ınfraqurylymdy jasap, ony qoldaý júıelerin oılap taptyq. Memleket óz tarapynan qarjy bólip, bilikti mamandardy jumysqa tartty. Meniń oıymsha, Koreıanyń atalmysh saladaǵy tájirıbesi men engizgen jańalyqtary Qazaqstan úshin sý tapshylyǵy máselesin sheshýge septigin tıgize alady», - dedi Lı Vý Kıýn.
