Qazaqstannyń stýdentter energııa únemeıtin kólik qurastyryp, Indonezııada bedeldi marapatqa ıe boldy
«Bizdiń stýdenttik «SU Racing Team» komandasy Shell Eco Marathon Asia-Pacific and the Middle East 2023 halyqaralyq stýdenttik ınjenerlik komandalar birinshiliginde joǵary mártebege ıe boldy. Energııa únemdeıtin kólikter jarysyna qatysýǵa tek ýnıversıtet stýdentteri ázirlep, qurastyrǵan jáne ózderi basqaratyn kólikterge ǵana ruqsat etiledi»,-deıdi SU Racing Team» komandasynyń kapıtany Álibek Ibraım.
Onyń sózinshe, jarysqa Azııa-Tynyq muhıty aımaǵy men Taıaý Shyǵys elderinen 80-nen astam ýnıversıtet komandasy qatysty. Qazaqstandyq stýdentter 1 kVt/saǵ elektr batareıaly energııamen 261,1 km jol júrgen modýldik bólshekteletin avtokólik qurastyrdy.
«SU Racing Team» komandasynyń Qytaı, Fılıppın, Indonezııadan kelgen komandalarǵa tejeý mehanızmin ornatý, retteý jáne tehnıkalyq tekserýden ótýge kómektesýiniń nátıjesinde «SU Racing Team» komandasy Spirit of Shell Eco-marathon Award Winner júldesimen marapattaldy – bul jarysqa qatysqan komandalardyń bir-birine ózara kómek kórsetkeni úshin beriletin nagrada. Qazaqstannan barǵan stýdentterdiń arqasynda joǵaryda atalǵan elderdiń komandalary tehnıkalyq baıqaýdan ótip, jarysqa qatysýdy jalǵastyra aldy, sóıtip jarys jolyna shyqty.
– Sońǵy úsh kún úmit pen úreıge toly boldy, álemniń túkpir-túkpirinen eń myqty komandalar jınaldy, olar – tehnologııany ázirleý, satyp alý jáne paıdalaný úshin «kosmostyq» qarjy jumsaǵan eń kúshti komandalar. Az ǵana ýaqyt ishinde biz naǵyz senimdi mashına qurastyra alǵanymyzǵa jáne ádil qazylar kóptegen qatysýshylar arasynan bizdiń komandanyń jumysyna joǵary baǵa bergenine men óte qýanyshtymyn», – dedi «SU Racing Team» komandasynyń kapıtany Álibek Ibraım.
