Qazaqstannyń memlekettik bıýdjetiniń kirisi 15 paıyzdaı artty

ASTANA. QazAqparat - 2023 jyldyń 6 aıynda Qazaqstannyń memlekettik bıýdjeti 11,38 trln teńgeni qurady, bul 2022 jyldyń uqsas kezeńinen 14,8%-ǵa artyq (2022 jyldyń 6 aıynda 9,92 trln teńge), dep habarlaıdy QR Ulttyq ekonomıka mınıstrliginiń baspasóz qyzmeti.

Qarastyrylyp otyrǵan kezeńderde memlekettik bıýdjettiń kiris bóliginiń qurylymy birdeı: eń úlken úlesti salyq túsimderi men transfertter túsimderi quraıdy.

Bul rette salyq túsimderi dástúrli túrde memlekettik bıýdjetti qalyptastyrýdyń negizgi kózi bolyp qala beredi, ıaǵnı, 2023 jylǵy 1-jartyjyldyqta barlyq kiristerden 78,9% (8,98 trln teńge) (2022 jylǵy 1-jartyjyldyqta 72,1% (7,15 trln teńge)) quraıdy. Taldanatyn kezeńdegi salyq túsimderiniń qurylymynda QQS jáne KTS basym, olardyń úlesine 2023 jyldyń 6 aıynda tıisinshe 29,3% jáne 26,8% salyq túsimderi tıesili (2022 jyldyń 6 aıynda tıisinshe 26,0% jáne 27,8%).

Transfertter túsimderi memlekettik bıýdjettiń kiris bóliginiń tórtten bir bóligin quraıdy. Ol 2023 jylǵy 1-jartyjyldyqta 18,8% (2022 jylǵy 1-jartyjyldyqta 24,6%) teń.

Osylaısha, taldanyp otyrǵan kezeńde Ulttyq qordan transfertter 2,14 trln teńgeni qurady, onyń ishinde kepildendirilgen transfertter – 1,20 trln teńge, nysanaly transfertter – 0,94 trln teńge (2022 jylǵy 1-jartyjyldyqta 2,44 trln teńge, onyń ishinde kepildendirilgen transfertter – 2,23 trln teńge, nysanaly transfertter – 0,21 trln teńge).

Salyqtyq emes túsimder jáne negizgi kapıtaldy satýdan túsetin túsimder memlekettik bıýdjettiń kiris bóligindegi eń az úlesti alady: 2023 jylǵy 1-jartyjyldyqta tıisinshe 1,7% (0,20 trln teńge) jáne 0,6% (0,07 trln teńge) (2022 jylǵy 1-jartyjyldyqta tıisinshe 2,2% (0,21 trln teńge) jáne 1,1% (0,11 trln teńge)).