«Qazaqstannyń dinı alańy tazartyldy» - respýblıkalyq basylymdarǵa sholý
***
«Egemen Qazaqstan» gazetiniń búgingi sanynda «Qazaqstannyń dinı alańy tazartyldy» degen taqyryppen QR Din isteri agenttiginiń tóraǵasy Qaırat Lama Shárippen bolǵan suhbat berilgen.
«Osydan týra bir jyl buryn «Dinı qyzmet jáne dinı birlestikter týraly» Zań óz kúshine endi. Atalǵan zańnyń 24-babyna sáıkes dinı birlestikter osy Zań qoldanysqa engizilgen kúnnen bastap bir jyldyń ishinde jańa talaptarǵa sáıkes ózderiniń quryltaı qujattaryna qajetti ózgerister engizýge tıis bolatyn», - deıdi avtor suhbattyń kirispesinde.
Odan ári suhbat joǵaryda atalǵan zańnyń sheńberinde qaıta tirkeýden ótken dinı birlestikter men uıymdar jaıynda, jalpy elimizdegi dinı ahýal turǵysynda órbıdi.
«Dinı ustanymyna qaraı da birqatar ózgerister boldy, biraq qalyptasqan konfessııaaralyq tepe-teńdik saqtalyp qaldy: ıslam dini - 72%, pravoslavıe - 9%, katolıktik - 3%, protestanttyq - 14%, qalǵan dinı konfessııalar 2%-dy quraıdy», - deıdi Qaırat Lama Shárip.
***
«Aıqyn» gazetiniń búgingi sanynda birqatar ózekti maqalalar jarııalandy. Solardyń biri «Ala-qula aýdarmadan qashan arylamyz?» degen taqyryppen berilgen.
Maqala avtory «shúkir deıik, memlekettik tildiń qoldanylý aıasy kún saıyn artyp barady. Búginde birqatar qujattar qazaq tiline tárjimalanyp, qoldanysqa enýde. Áıtse de keı salada qazaq tili áli de jetimniń kúıin keship júr. Ásirese, zań tili, quqyq qorǵaý tili birqatar aqsap otyrǵany jasyryn emes. Bir termınniń qazaq tilindegi birneshe nusqasyn qoldanyp júrmiz. Quqyq tili naqtylyqty qajet etedi, sol sebepti ony jan-jaqty paıymdap, pysyqtap alyp, qoldanysqa engizý kerek» deı kele, «Quqyq qorǵaý salasyndaǵy termınderdi birizdendirý» atty respýblıkalyq semınarǵa qatysýshylardyń osy másele jónindegi pikirlerin beredi.
«Qazirgi tańda zań termınderin, quqyq qorǵaý salasyndaǵy termınderdi iriktep, bir kitapqa jınap, shyǵarýdy qolǵa alýdamyz. Termınderdiń qazaq tilindegi nusqasyn kitap retinde ǵana emes, veb-portalǵa da daıyndadyq. Quqyq qorǵaý salasynda naqty aýdarmasy joq sózder de kezdesedi. Máselen, lıder, avtorıtet, kamera sııaqty sózder árqıly aýdarylyp keledi. Qylmystyq is júrgizý kodeksinde «podozrevaemyı» degen sóz «sezikti» dep berilse, keı jerde «kúdikti» dep beriledi. Osy sııaqty birneshe maǵynamen aıtylatyn sózder barshylyq», - deıdi Іshki ister mınıstrliginiń Memlekettik til jáne aqparat departamenti bastyǵynyń orynbasary Baqyt Serikhanuly.
Maqalada sondaı-aq, Qazaq gýmanıtarlyq zań ýnıversıtetiniń Ulttyq quqyq joǵary mektebiniń dırektory, zań ǵylymdarynyń doktory, professor Ýnzıla Sharapatulynyń, Mádenıet jáne aqparat mınıstrligi Til komıteti tóraǵasynyń orynbasary Sherýbaı Qurmanbaıulynyń pikirleri berilgen.
***
«Alash aınasy» gazetiniń № 190 sanynda birneshe qyzyqty materıaldar jarııalandy. Solardyń biri «Shash «sharýashylyǵy» sharshap tur» degen taqyryppen berilgen.
«Tazǵa taraq ne teńimniń» zamany ótken. Degenmen «Taz bolsań, taqııadan kórme» deımiz taǵy da... Iá, ǵylym qarqyndy damyp otyrǵan myna zamanda tazdy qolańshashqa aınaldyrý da túk bolmaı qaldy. Oǵan tańǵalýdyń ózi ersi kórinetindeı me, qalaı?.. Rasynda, búginde álemde qarqyndy damyǵan trıhologııa ǵylymynyń arqasynda tazǵa shash «egip» ósirýde. Shash sharýashylyǵymen aınalysatyndar kóbeıip keledi, shúkir. Soǵan oraı, shash «aýrýyna» shaldyqqandar da az emes...» - deıdi avtor maqalasynda.
«Qazaq qaryzǵa ómir súrýge nege qushtar?!» degen maqaladan nesıe alýdyń neshe túrli qıyryn sharlap shyǵasyz.
«Búginde Qazaqstanda bankke qaryzy joq adam kemde-kem. Aqshany tegin berip jatqandaı alady, al artynan eselep qaıtarýǵa qaýqary jetpeı, óz-ózine qol jumsaý faktileri jıilep barady. Batystan engen osy bir nesıege ómir súrý úlgisi bizdiń qoǵamda sánge aınalǵandaı, paıyzdyq ústeme aqysynyń sharyqtap turǵanyna qaramastan, jyl ótken saıyn nesıe alýshylar da, qaryzdyń kólemi de artyp keledi. Psıhologter nesıege qushtarlyq - aýrý dese, ekonomıster bank qarapaıym halyqtyń qarjylyq saýatynyń tómendigin paıdalanyp, aldap otyr degen pikirde» deıdi gazet.
