Qazaqstannyń Bas múftıi «Taza álem» aktsııasyna qatysty

NUR-SULTAN. QazAqparat - Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly respýblıka kóleminde ótken «Taza álem» tazalyq aktsııasyna qatysty, dep habarlaıdy QazAqparat tilshisi.

Igi sharany Dinı basqarmanyń Jastar isi sektory «Rýhanı kelisim kúnine» oraı uıymdastyrsa, elimizdiń barlyq óńirindegi ókildikter bir mezette aktsııaǵa úles qosty. Atap aıtqanda, ımamdar men din qyzmetkerleri, meshitterdiń erikti jamaǵaty men jastar atsalysqan aktsııada óńirlerdiń kórikti jerlerine, meshitter mańyna tazalyq jumystary júrgizildi.

«Búgin QMDB-nyń Jastar isi sektory «Rýhanı kelisim kúni» aıasynda respýblıkalyq tazalyq aktsııasyn ótkizip otyr. Hadısterde «Alla Taǵala – taza jáne taza bolǵandy jaqsy kóredi» delingen. Árıne rýhymyzdy, tánimizdi taza ustaý – musylmanshylyq mindetimiz. Sonymen qosa tabıǵatty aıalaý, ony taza ustaý da – musylmannyń mindeti. Sondyqtan búgingi shara –Paıǵambarymyzdyń (oǵan Allanyń salaýaty men sálemi bolsyn) súnnetin jalǵastyrýdyń bir kórinisi. Alla Taǵala nıetimizdi qabyl etkeı! – dedi Bas múftı.

Qazaqstan musylmandary dinı basqarmasynyń málimetinshe, «Taza álem» respýblıkalyq tazalyq aktsııasyna elimizdiń túkpir-túkpirinde 500-ge jýyq erikti jastar qatysty.