Qazaqstannyń azamattyq qoǵamynda jaýapkershilik bar - Aıgúl Soloveva
Onyń paıymynsha, aldaǵy Májilis pen máslıhat saılaýyna baılanysty elimizde saıası belsendilik deńgeıi kúrt joǵarylap otyr.
«Bireýleri jańa saıası partııalardy qurý bastamasyn jarııalap jatsa, basqalary saılaýǵa qatyspaıtynyn alǵa tartýda. Al partııalardyń taǵy bir bóliginde belsendilik deńgeıi edáýir joǵarylaǵanyn baıqap júrmiz. Bul turǵyda azamattyq qoǵam qozǵaýshy kúsh bolyp sanalady. Osy qarasha aıynda Azamattyq forým ótetini belgili, onda azamattyq qoǵamnyń daıyndyǵy men belsendiginiń nátıjesi shyǵarylady. Meniń oıymsha, elimizdegi azamattyq qoǵam qarqyndy damý kezeńinde tur. Qazirgi kezde olardyń jaýapkershiligi joǵary ekenin atqarylyp jatqan jumystardan kórýge bolady. Bastapqy kezeńde úkimettik emes uıymdar problemany kótergenimen, ony sheshý joldaryn tıisti deńgeıde bilmeıtin edi. Al qazir bul sektor naqty qadamdar jasaýǵa qaýqarly ekeni anyq baıqalyp otyr», - dedi A.Soloveva.
Osy oraıda ol saılaý aldyndaǵy saıası landshaft turǵysynda qoǵamdyq saıasat jáne tek taza saıasat bar ekenin baıqaǵanyn jetkizdi. Qoǵamdyq saıasat – ol azamattar ókilderiniń kózqarastary men ustanymdaryn qalyptastyrý. Taza saıasat – ol bılik úshin kúres. Saıası partııalar bılik úshin talasqa tússe, al úkimettik emes sektor bılik úshin tartys ádil ári taza ótýine yqpal etedi. Sondyqtan saılaý naýqanynda úkimettik emes sektordyń baıqaýshy retindegi máni men mańyzynyń negizi osynda jatyr.
«Atap aıtqanda, úkimettik emes uıymdardyń baıqaýshylary tirkeýden ótip, ýchaskeler boıynsha jumys isteıdi. Bul rettý saılaý kezinde daýys berý barysyn qaraıtyn adamdar kóp bolady. Olardyń osy naýqanǵa qatysýy ashyqtyqty qamtamasyz etedi, ıaǵnı qoǵam saılaý nátıjesine senim bildirýi úshin jaǵdaı jasaıdy. Ózderińiz bilesizder, keıbir kórshiles elderde birneshe ret revolıýtsııa ótkenimen, meńzegen nátıjesine qol jetkize almady. Olarǵa qaraǵanda biz evolıýtsııalyq jolmen jyljyp kelemiz. Bul óz kezeginde elimizde reformalar júrgizýge, kemshilikterdi aıqyndaýǵa, odan qorytyndy shyǵarýǵa, sondaı-aq ary qaraı qozǵalýǵa múmkindik beredi», - dep túsindirdi Aıgúl Soloveva.
Onyń sózine qaraǵanda, Sybaılas jemqorlyqqa qarsy strategııany iske asyrýǵa syrtqy taldaý jáne baǵalaý júrgizetin respýblıkalyq arnaıy monıtorıng toby tıisti Hartııany daıarlamaq. Onda EQYU-nyń, halyqaralyq konventsııalardyń negizgi prıntsıpteri, sondaı-aq Qazaqstan zańnamasynyń normalary qamtylady. Qujat táýelsiz baıqaýshylardy osy barlyq normalar men prıntsıpterdiń saqtalýyn qaraýǵa shaqyrady. Bul turǵyda saılaý kezinde túsinispeýshilik bolmaýy úshin, sondaı-aq naýqan barysynda zańsyzdyqqa jol berilmeýi úshin jaǵdaı jasalady. Osy baǵytta qoǵamda atalǵan saılaýǵa qatysty senim de bolady.
«Aldaǵy saılaýda baıqaýshylar sany edáýir artady degen oıdamyn. Osy oraıda daýys berý protsesi egjeı-tegjeıli nazarda bolady», - dedi qoǵam qaıratkeri.
Onyń pikirinshe, aýmaqtyq jáne ýchaskelik saılaý komıssııalary quramynyń eleýli túrde jańarýy da óziniń ońtaıly rólin atqarady. Sonymen qatar, prokýratýra organdary zańdylyqtyń saqtalýyn tyńǵylyqty baqylap, eskertýlerge shuǵyl áreket etýi kerek. Sebebi erejeni nemese zańnamany buzý faktileri oryn alsa, bul óz kezeginde qoǵam tarapynan qarsy reaktsııanyń bolýyna yqpal etedi.
A.Solovevanyń atap ótýinshe, bıyl keıbir memleketterde saılaý naýqany kezinde zańnama talaptarynyń tıisti deńgeıde oryndalýyna qatysty qoǵam tarapynan kúdik boldy. Osynyń saldarynan halyq narazylyq bildirip jatty, keıinnen bul qozǵalys jaǵdaıdy múldem ýshyqtyryp jiberdi.
«Jalpy, saılaý naýqanyna qatysty boljam aıtý qıyn. Degenmen elimizde talaptardyń oryndalýy turǵysynda tıisti zańnamalyq jaǵdaılar jasaldy. Menińshe, bizde saılaýǵa senimsizdik bolmaýy úshin táýekelder barynsha eskerildi», - A.Soloveva.
Sóz sońynda ol Qazaqstan halqy turaqtylyq pen zańdylyqty baǵalaıtynyn atap ótti. Sondyqtan elimizde ótken saılaýlardaǵy sekildi aldaǵy daýys berý naýqanyn tynysh ári baısaldy túrde ótkizý úshin barlyq jaǵdaı bar dep aıtýǵa bolady.