Qazaqstannyń 16 ýnıversıteti QS halyqaralyq reıtıngisine qatysty

NUR-SULTAN. QazAqparat – Bıyl Qazaqstannyń 16 ýnıversıteti QS halyqaralyq reıtıngisine qatysty. Bul týraly búgin Úkimet otyrysynda Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat tilshisi.

Onyń atap ótýinshe, «Bilimdi ult» sapaly bilim berý» ulttyq jobasynyń «Joǵary jáne joǵary oqý ornynan keıingi bilim berý» baǵyty boıynsha negizgi kórsetkishi eki otandyq ýnıversıtettiń QS Halyqaralyq reıtıngisiniń TOP–200 qataryna kirýi bolyp otyr.

«QS reıtıngisine qatysýdaǵy 9 jyl ishinde oń dınamıka baıqalady. Eger 2013 jyly 8 joǵary oqý orny qatyssa, búginde olardyń sany eki ese ósti. 2022 jyly atalǵan reıtıngige 16 qazaqstandyq JOO kirdi. Onyń ishinde top-500 quramyna 5 JOO kirip otyr. Olar: Ál-Farabı atyndaǵy QazUÝ, L.Gýmılev atyndaǵy EUÝ, M.Áýezov atyndaǵy OQMÝ, Q.Satbaev atyndaǵy QazUǴTÝ, QazUAÝ. Top 200-ge ál-Farabı atyndaǵy Qazaq ulttyq ýnıversıteti kirdi. 2021 jyly ol 175 orynǵa, 2022 jyly 150 orynǵa ıe boldy. Reıtıngige qatysatyn joǵary oqý oryndary sanynyń turaqty ósý úrdisin baıqap otyrmyz», - dedi Saıasat Nurbek.