Qazaqstannyń 100 jańa esimin halyq tańdaıdy
Bul jańalyqty búgin Ortalyq kommýnıkatsııalar qyzmetindegi baspasóz máslıhatynda Aqparat jáne kommýnıkatsııalar mınıstriniń orynbasary Alan Ájibaev habarlady.
Aǵymdaǵy jyldyń 7-nshi maýsymy men 15-inshi qyrkúıegi aralyǵynda jumys tobynyń hatshylyǵyna atalǵan jobaǵa qatysýǵa búkil elimizdiń aýmaǵynan kóptegen ótinishter túsken. Sonyń ishindegi 2 112 úmitkerdiń tarıhy el.kz portalynda jarııalanyp, halyqqa tanystyryldy. Túptep kelgende, saraptamalyq jáne jumys toptarynyń qorytyndylarynyń negizinde 302 adamnyń tizimi jasaldy. Alaıda, sonyń ishindegi 100 adam ǵana atalǵan jobaǵa kiretini málim. Al kimniń ol júzdiktiń ishine kiretinin halyq tańdaıdy.
«Ótinishterdi irikteý kezindegi eń basty krıterıı - ár adamnyń táýelsiz Qazaqstannyń damýyna qosqan naqty úlesi baǵalanady. Halyqtyq daýys berýge qatysatyn 302 adamnyń tizimi jasaldy. Ondaǵy árbir úmitkerdiń tabysynyń tarıhy kúlli elimiz bilýge laıyqty»,-dedi baspasóz máslıhatynda Alan Ájibaev.
Qazaqstan halqy Assambleıasy tóraǵasynyń orynbasary Darhan Myńbaı barlyq qazaqstandyqtardy daýys berýge belsene qatysýǵa shaqyrdy. «Qazaqstannyń 100 jańa esiminiń» tizimine kimderdiń kiretinin biz halyqtyń tańdaýynan ǵana bilemiz. Bul jobanyń túpki maqsaty - qazirgi qoǵamymyzdaǵy aıtýly tabysqa jetken 100 adamnyń tarıhyn jarqyratyp kórsetý. Al joba arqyly óziniń aqylymen, talantymen, qol eńbegimen elimizdiń damýyna ólsheýsiz úles qosyp júrgen jańa adamdardyń esimderin ashý kózdelip otyr. Ol adamdardy qazirgi zamanǵy Qazaqstannyń maqtanyshy deýge ábden bolady. Olardyń kez-kelgeniniń tabysqa jetýiniń tarıhy jas urpaqqa laıyqty úlgi bolary sózsiz»,- dedi Darhan Myńbaı.
«Qazkontent» AQ-nyń basqarma tóraǵasy Evgenıı Kochetov ár adamnyń úsh úmitkerge deıin daýys bere alatynyn málim etti. Onyń aıtýynsha, 100 jańa esim ǵalamtor arqyly irikteledi. «Elimiz úshin asa mańyzdy joba boıynsha daýys berý 18 qazan kúni, ıaǵnı, sársenbiniń sátinde bastalady. 302 úmitkerdiń ishinen 100 jańa esimdi halyq tańdaıdy. Yńǵaıly bolýy úshin úmitkerlerdi 6 topqa bóldik. Mádenıet boıynsha - 32 adam, qoǵam - 83, bıznes - 51, medıtsına - 46, ǵylym - 47, sport boıynsha - 43 adam bar»,-dep túsindirdi ol.
Evgenıı Kochetov tilshiler qaýymyna 100esim.el.kz saıtynda qalaı daýys berýge bolatynyn túsindirip berdi. Birinshiden, daýys beremin degen adam 100esim.el.kz saıtyna tirkelýge mindetti. «Biz tirkelýdi iske qostyq. Óıtkeni kez-kelgen úmitkerge qatysty jalǵan daýys bolmaýy kerek. Bul - qaýipsizdik sharalarynyń biri. Kez-kelgen adam óziniń elektrondy poshtasynyń mekenjaıy arqyly nemese áleýmettik jelidegi akkaýnty arqyly saıtqa tirkele alady»,- dedi E. Kochetov. Ekinshiden, 18 qazannan bastap saıtqa kirgen ár adam úsh úmitkerge daýys berýge quqyly. Alaıda bir úmitkerge biraq ret daýys beriledi. Qaıtalap daýys berýge tyıym salynady. Eń bastysy, daýys berý protsesi Feısbýk, Instagram, Vkontakte áleýmettik jelilerinde kúndelikti ashyq kórsetilip otyrady. Halyqtyq daýys berý rásimi aǵymdaǵy jyldyń 10-ynshy qarashasyna deıin júrgiziledi.
