Qazaqstannyń jalpy ishki ónimi 10 aıda 6,4 paıyz ósti
ASTANA. KAZINFORM - Ulttyq statıstıka bıýrosynyń aldyn ala derekteri boıynsha, 2025 jyldyń qańtar-qazan aılarynda Qazaqstannyń Jalpy ishki ónimi (JІÓ) ótken jyldyń sáıkes kezeńimen salystyrǵanda 6,4%-ǵa ósti, dep habarlady QR Ulttyq ekonomıka mınıstrliginiń baspasóz qyzmeti.
Baspasóz qyzmetiniń málimetterine qaraǵanda, taýar óndirisi 8,2%-ǵa, qyzmet kórsetý 5,3%-ǵa artty. JІÓ-niń ósýine anaǵurlym eń kóp úlesti ónerkásip (ósim 7,3%) salasy qosty, onyń jalpy ósimdegi mólsheri – 30%. Al saýda jáne kólik salalarymen qosqanda 70%-dan asady.
Óńdeý ónerkásibinde ósim 5,8% boldy. Bul jekelegen baǵyttar boıynsha ónim shyǵarýdyń ulǵaıýy esebinen qalyptasyp otyr.
Olardyń ishinde:
● mashına jasaý – 11,5%-ǵa,
sonyń ishinde avtomobıl qurastyrý - 13,3%-ǵa,
● hımııa ónerkásibi – 10,9%-ǵa,
● azyq-túlik – 9,1%-ǵa,
● munaı ónimderi – 6,3%-ǵa,
● metall buıymdary – 14,1%-ǵa,
● qurylys materıaldary – 5,3%-ǵa ósti.
Qurylys salasynda ósim iri ınfraqurylymdyq jobalardy júzege asyrýmen baılanysty bolyp otyr. Qurylys jumystarynyń kóleminiń artýy 2025 jylǵy qańtar-qyrkúıektegi 14,9%-ben salystyrǵanda 15,1%-dy qurady.
Aýyl sharýashylyǵy salasy maýsymdyq ósý fazasyna endi. Jalpy ónim kólemi qańtar-qyrkúıek aılarymen salystyrǵanda 1,0 p. t.-ǵa jedeldep, 5,4%-ǵa artty. Ósimdik sharýashylyǵynda ósim 6,7%-ǵa, mal sharýashylyǵynda 3,4%-ǵa jetti. Jalpy ónimniń ósýi memlekettik qoldaý sharalarymen, agrotehnologııalardy saqtaýmen jáne egin jınaý kezindegi qolaıly aýa-raıymen baılanysty bolyp otyr. Birqatar óńirde dándi daqyldardyń ónimdiligi artty. Olardyń ishinde Aqmola (+13,6%), Qostanaı (+14,9%) jáne Pavlodar (+7,4%) oblystary bar. Sút óndirisi 5,2%-ǵa, et óndirisi 2,8%-ǵa, jumyrtqa óndirisi 1,4%-ǵa ósti.
Saýdada ósim deńgeıi 9%-dy qurady. Ósý qarqyny saladaǵy úlesi 66,5% bolatyn kóterme saýda kásiporyndarynda baıqalyp otyr. Aınalym qarajatynyń ulǵaıýy Pavlodar, Atyraý oblystary men Astana qalasynda tirkelgen.
Kólik salasynda da ósimniń joǵarǵy qarqyny saqtalyp otyr. Barlyq kólik túri boıynsha tasymaldyń ósýine baılanysty kólik qyzmetiniń kólemi 20,7%-ǵa artty.
-Úkimet basym salalardy qoldaýǵa, ekonomıkany ártaraptandyrýǵa jáne ınvestıtsııalar tartýǵa basa nazar aýdara otyryp, sapaly ekonomıkalyq ósimdi qamtamasyz etýge baǵyttalǵan Prezıdent tapsyrmalaryn oryndaý úshin jumys istep jatyr, - delingen habarlamada.
Osyǵan deıin bıylǵy 9 aıda el ekonomıkasynyń ósimi 6,3%-dy quraǵany týraly jazdyq.