Qazaqstannyń jasóspirimder quramasy Junior Davis Cup týrnıriniń fınaldyq kezeńine shyqty
ASTANA. KAZINFORM – Tennısten Qazaqstannyń 16 jasqa deıingi jasóspirimder quramasy Junior Davis Cup jarysynyń fınaldyq kezeńine joldama aldy. Bul týraly QTF habarlady.
Shymkentte ótip jatqan Azııa/Muhıt jaǵalaýy aımaqtyq irikteý týrnıriniń jartylaı fınalyna joldama alǵan otandastarymyz álemdik birinshiliktiń sheshýshi satysyna merziminen buryn ótti.
Shırek fınaldyq básekede Qazaqstan quramasy Gonkong komandasyn utty. Alǵashqy bolyp kortqa shyqqan Ahmadı Mahanov qarsylasy Takýto Matsýony 6:2, 6:3 esebimen qapy qaldyrdy. Odan keıingi kezdesýde Ańsar Nıetqalıev Choı Fý Vangtan 6:3, 6:4 esebimen basym túsip, jalpy eseptegi jeńisti bekitti.
Jekeleı syndaǵy eki matchtan keıin esep 2:0 bolyp, kezdesý taǵdyry sheshilgendikten, juptyq oıyn ótkizilgen joq.
Іrikteýdiń jartylaı fınalynda bizdiń tennısshiler Úndistan men Ózbekstan matchynyń jeńimpazymen kezdesedi (ázirge bul teketireste esep – 1:0).
Aımaqtyń eń úzdik tórt komandasy joldama alatyn Junior Davis Cup týrnıriniń fınaldyq kezeńi osy kúzde ótedi. Jyldyń basty dodasynda álemniń eń myqty 16 jasóspirimder quramasy bas qosady. Jarystyń qaı qalada ótetinin Halyqaralyq tennıs federatsııasy (ITF) keıinirek jarııalaıdy.
Shymkenttegi irikteý kezeńinde el namysyn Ahmadı Mahanov, Ańsar Nıetqalıev jáne Rodıon Traıgel qorǵap jatyr. Jasóspirimder quramasy kortqa kapıtan Sergeı Kvaktyń jetekshiligimen shyqty.
Ótken jyldardyń nátıjeleri
- 2023 jyl: Qazaqstan quramasy óz tarıhynda tuńǵysh ret Shymkenttegi irikteýden ótip, Ispanııadaǵy álem chempıonatynyń fınaldyq kezeńinde úzdik ondyqtyń qatarynan kórindi.
- 2024 jyl: Komanda tarıhı rekordty jańartty – taǵy da óz úıindegi irikteý kezeńinen sátti ótip, Túrkııadaǵy álem birinshiliginde joǵary 5-orynǵa taban tiredi.
Aıta ketelik Anna Danılına Franııadaǵy týrnırdiń fınalyna shyǵý úshin baq synaıdy.
