Qazaqstannyń úsh qalasynan jasyrylǵan 500 esirtki oramy tabyldy

Batys Qazaqstan oblysy polıtsııa departamentiniń esirtki qylmysyna qarsy is-qımyl basqarmasynyń qyzmetkerleri Batys Qazaqstan jáne Atyraý oblystarynyń aýmaǵynda baılanyssyz jasyrý ádisimen marıhýana jáne gashısh esirtki quraldaryn satýmen aınalysqan ınternet-dúkenge tosqaýyl qoıdy, dep habarlaıdy Polisia.kz.

Jedel-tergeý is-sharalaryn júrgizý barysynda joǵaryda atalǵan ınternet-dúkenniń operatory jáne kýreri bolǵan Oral qalasynyń eki turǵyny ustaldy. Atyraý, Oral jáne Aqsaı qalalarynda olar buryn jasyryp ketken 500-den astam esirtki oramy tárkilendi.

Aıta ketý kerek, olardyń 300-den astamy Atyraýda Jaıyq ózeniniń jaǵasyndaǵy qoǵamdyq oryndardan tabyldy. Qazirgi tańda esirtki dúkenin uıymdastyrýshyny anyqtaý jáne ony buǵattaý boıynsha jumys júrgizilip jatyr.

– Jyl basynan beri Іshki ister mınıstrligi ınternet-dúkenderdiń 19 uıymdastyrýshysyn, 105 operator men 297 esirtki jasyrýshyny ustady. Esirtki quraldarynyń taralýy týraly aqparatty qamtıtyn 3500 ınternet-resýrs anyqtalyp, buǵattaldy, – dedi QR ІІM esirtki qylmysyna qarsy is-qımyl departamenti bastyǵynyń orynbasary Sarqytbaı Qusaıynov.