Qazaqstannyń UFC týrnırin ótkizý múmkindigi bar ma

ASTANA. KAZINFORM — Elimizdiń halyqaralyq deńgeıdegi UFC týrnırin ótkizýge tolyq múmkindigi bar ma? Bul saýalǵa mamandar jaýap berdi.

Ortalyq kommýnıkatsııalar qyzmeti alańynda ótken baspasóz máslıhatynda «MMA sporty qarqyndy damyp keledi. Jaqynda UFC prezıdenti Dana Ýaıt Qazaqstanda týrnır ótkizýge qarsy emes ekenin jáne bolashaq josparda baryn aıtty. Osy oraıda Astana álemdik týrnırdi qabyldaı ala ma?» degen saýal qoıyldy.

— Árıne, týrnırge qyzyǵýshylyq tanytyp otyrmyz. Buǵan deıin aıtqanymdaı, qalanyń ınfraqurylymy men aýqymdy kólemdegi qonaqtardy qabyldaýǵa qaýqary bar. Bizdiń alań halyqaralyq standarttar men talaptarǵa tolyq sáıkes keledi. Bul qalanyń ekonomıkasy úshin mýltıplıkatıvti áser beredi, — dep jaýap berdi Astana qalasyndaǵy týrızmdi damytý ortalyǵynyń basshysy Artem Kvashýk brıfıng barysynda.

«Astana kontsert» kompanııasynyń prodıýseri Málik Hasenovtiń málimdeýinshe, UFC týrnıri deńgeıindegi is-sharany «Barys Arena» kesheninde esh qıyndyqsyz ótkizýge bolady.

— Keshen UFC-diń barlyq raıderine sáıkes keledi. Onyń ústine elimizde óte tanymal jekpe-jek sportshylary bar, mysaly Shavkat Rahmonov. Týrnır ótkizýge tehnıkalyq jaǵynan da, ınfraqurylym boıynsha da daıynbyz. Tek jumys isteýdi qajet etetin baǵyt, halyqaralyq seriktester men demeýshilerdi tartý. UFC týrnıriniń shamamen qansha turatynyn eskersek, jergilikti demeýshiler esebinen ótkizý óte qymbatqa túsedi. Aýqymdy kommertsııalyq is-shara Qazaqstanda áli bolǵan joq deýge bolady. Biraq, qazirgi naryqtyń damýymen joǵary deńgeıge jetemiz dep oılaımyn, bul 2–3 jyldyń máselesi, — deıdi ol.

Eske salaıyq, UFC týrnırlerinde birneshe otandasymyz jeńiske jetip júr. Bıyl naýryzda qazaqstandyq jekpe-jekshi Asý Almabaev ekinshi márte jeńiske jetti. 

Sondaı-aq bıyl mamyrda qytaılyq qazaq faıter Road to UFC týrnıriniń fınalyna joldama aldy. 

Odan bólek, 2021 jyly qazaqstandyq Sergeı Morozov UFC týrnırinde alǵash ret jeńiske jetti.