Qazaqstannyń taza energetıkany damytatyn jaqsy áleýeti bar – Qytaılyq sarapshy

ASTANA. KAZINFORM – Qazaqstandaǵy mashına jasaý salasynyń damýy jáne taza energetıkaǵa kóshý perspektıvalary qytaılyq ınvestorlardyń qyzyǵýshylyǵyn týdyryp otyr. Bul týraly Qytaıdyń Halyqaralyq saýdaǵa járdemdesý komıteti janyndaǵy Mashına jasaý komıteti tóraǵasynyń orynbasary Chjoý Haımın málimdedi.

− Qazaqstannyń taza energetıkany damytatyn jaqsy áleýeti bar. Oǵan qosa, munda ınnovatsııalyq tehnologııalar da damyp keledi. 2030 jylǵa qaraı jańartylatyn energııa kózderiniń úlesi 30%-ǵa deıin artady dep kútilýde, − dedi spıker Qazaqstan mashına jasaýshylarynyń XII forýmynyń kýlýarynda.

Metallýrgııa salasyna qatysty Chjoý Haımın Qazaqstan men Qytaı arasyndaǵy ekijaqty qarym-qatynas óndiris kóleminiń artýyna yqpal etkenin aıtty – sala 1,8 mıllıard dollarǵa ósken.

Sóz sońynda ol eki el arasyndaǵy yntymaqtastyqty odan ári nyǵaıtýǵa daıyn ekenin jetkizdi.

− Bizdiń Halyqaralyq saýdaǵa járdemdesý komıteti Qazaqstan mashına jasaýshylary odaǵymen birlesip yntymaqtastyqty jalǵastyrýǵa daıyn. Biz qazaqstandyq jáne qytaılyq kompanııalar arasyndaǵy halyqaralyq áriptestikti qamtamasyz etip, saýda men ınvestıtsııany damytýǵa yqpal ete alamyz, − dedi Chjoý Haımın.

Buǵan deıin Ch. Haımın Qytaı kompanııalary Qazaqstannyń mashına jasaý sektoryna, onyń ishinde negizgi komponentterdi óndiretin birlesken kásiporyndar qurýǵa qyzyǵýshylyq tanytqanyn aıtqan edi.

2028 jylǵa qaraı Qazaqstanda mashına jasaý kólemi 4,5 esege artady.