Elimizdiń syrtqy saýdadaǵy basty seriktesteri ataldy
ASTANA. KAZINFORM — Ótken jyldyń qorytyndysy boıynsha Qytaı, Reseı jáne Italııa elimizdiń iri saýda seriktesteri boldy — dál osy úsh memleketke eksporttyń da, ımporttyń da negizgi kólemi tıesili, dep habarlaıdy Saýda jáne ıntegratsııa mınıstrligi.
2024 jyly Qazaqstan syrtqy ekonomıkalyq qarym-qatynasy turaqty ósýip, dástúrli naryqtardaǵy pozıtsııasyn nyǵaıtyp, mıneraldy resýrstardyń senimdi eksporttaýshysy mártebesin saqtap qaldy.
Qazaqstannyń eksporttyq kirisi 2024 jyly 81 mlrd AQSh dolllarynan asty. Bul somanyń jartysynan astamy, ıaǵnı 42,9 mlrd AQSh dollary shıki munaıǵa tıesili, bul búkil qazaqstandyq eksporttyń 52,5%-yn quraıdy. Sonymen qatar, el syrtqy naryqqa ýran (4,6 mlrd AQSh dollary), mys jáne mys katodtaryn (4,1 mlrd AQSh dollary), sondaı-aq mys kenderi men kontsentrattaryn 3,2 mlrd AQSh dollary) belsendi túrde jetkizdi. Ferroqorytpalarǵa, tabıǵı gazǵa, bıdaıǵa jáne munaı ónimderine turaqty suranys saqtalyp otyr.
2024 jyly tehnıka, kólik jáne farmatsevtıka salasynda ımport belsendiligimen erekshelendi. Eń úlken kólem jeńil avtomobılderge ($2,3 mlrd), ushý apparattaryna ($1,8 mlrd), dárilik preparattarǵa ($1,7 mlrd) jáne telekommýnıkatsııalyq jabdyqqa tıesili boldy. Qazaqstandyq naryq daıyn buıymdardy da, jıyntyqtaýyshtardy — shanaqtardy, qosalqy bólshekterdi, esepteý tehnıkasyn da ımporttaı otyryp, jahandyq óndiristik tizbekke kirýin jalǵastyryp keledi.
— 2025 jyldyń basy osy tendentsııalardyń turaqtylyǵyn rastady. Qańtar aıynda Qazaqstannyń eksporty $4,5 mlrd qurady, onyń 60%-y taǵy da munaıǵa tıesili. Jetkizý qurylymynda mys, ferroqorytpalar, bıdaı, sondaı-aq ýran, tabıǵı gaz jáne kúnbaǵys maıy mańyzdy pozıtsııalar bolyp qala berdi. Qańtar aıynda ımport 2,8 mlrd AQSh dollarynan asty. Jetekshi sanattarǵa telefondar, avtomobıl korpýstary, dári-dármekter jáne jeńil avtomobılder jatady. Sondaı-aq qurylys tehnıkasy men qozǵaltqyshtardy jetkizýdiń ósimi baıqalady. Shıkizat eksporty men joǵary tehnologııalyq ónim ımporty arasyndaǵy teńgerimniń saqtalýy Qazaqstannyń syrtqy ekonomıkalyq baǵytynyń ornyqtylyǵyn rastaıdy, — delingen mınıstrlik habarlamasynda.
2025 jyly Qytaımen, Reseımen jáne Eýropalyq Odaq elderimen strategııalyq áriptestikti damytý, sondaı-aq Ortalyq Azııa naryqtaryndaǵy pozıtsııalardy nyǵaıtý basymdyq bolyp qala beredi.