Qazaqstannyń Qytaı, Ózbekstan jáne Túrkimenstanmen shekara beketteri ótkizý qabiletin 8 ese arttyrady
ASTANA. KAZINFORM – QR QM Memlekettik kirister komıteti Kedendik baqylaý departamentiniń dırektory Eldos Saýdabaev Qytaı Halyq Respýblıkasymen, Ózbekstan jáne Túrkimenstanmen shekaradaǵy ótkizý beketterin jańǵyrtý jumystary týraly aıtyp berdi.
«Eldiń tranzıttik áleýetin damytý jáne kórshiles eldermen taýar aınalymyn ulǵaıtý maqsatynda Úkimet Qytaı Halyq Respýblıkasymen jáne Ózbekstan, Túrikmenstanmen shekaradaǵy ótkizý pýnktterin tolyqqandy jańǵyrtýdy bastady», - dedi departament basshysy Memlekettik kirister komıtetinde ótken baspasóz máslıhatynda.
Onyń aıtýynsha, jańǵyrtý zamanaýı talaptarǵa saı kelmeıtin eski ınfraqurylymdy buzyp, jańa ótkizý beketterin salýdy kózdeıdi.
«Jańǵyrtý aıasynda jańadan «Alakól» avtomobıl beketi salynýda jáne onyń aýmaǵy aıtarlyqtaı keńeıtiledi. 2023 jyldyń maýsym aıynda «Dostyq-Temirjol» ınspektsııalyq-tekserý kesheni paıdalanýǵa berildi», - dedi Eldos Saýdabaev.
Memlekettik kirister komıtetiniń málimetinshe, jańǵyrtý jumystary ótkizý qabiletin 8 esege arttyrýǵa, barlyq taýarlar men kólik aınalymyn avtomattandyrý arqyly shekaradan ótý ýaqytyn 30 mınýtqa deıin qysqartýǵa múmkindik beredi.
