Qazaqstannyń qaı óńirlerinde ınvestıtsııalyq jobalar kóp

ASTANA. KAZINFORM – Qazaqstannyń ınvestıtsııalyq jobalary jalpyulttyq pýlynda 769 joba tirkelgen. Ondaǵy ınvestıtsııalardyń jalpy quny 34,3 trln teńgege baǵalanǵan.

Saýda jáne ınvestıtsııalyq saıasat jónindegi sarapshy Ernar Serik atap ótkendeı, keıbir jobalar belsendi iske asyrý satysynda emes.

Bul turǵyda, qazirdiń ózinde 48 paıyzynda qurylys-montaj jumystary atqarylyp (367 joba) jatyr. Al 40 paıyzy qujattamany daıyndaý satysynda (310 joba). 3 paıyzy (26 joba) boıynsha áli de qarjylandyrý izdestirilip otyr. Qalǵan 9 paıyzy (66 joba) iske qosyldy.

Jobalar sany boıynsha alda turǵan óńirler

— Astana — 2,3 trln teńgeni quraıtyn 123 joba;

— Shymkent — 432 mlrd teńgeniń 62 jobasy;

— Jambyl oblysy — 2,6 trln teńgeniń 49 jobasy;

— Qyzylorda oblysy — 956 mlrd teńgeniń 48 jobasy;

— Soltústik Qazaqstan oblysy — 755 mlrd teńgegeniń 46 jobasy.

Jobalardyń sany boıynsha aýtsaıderler — jańadan ashylǵan Ulytaý, Jetisý jáne Abaı óńirleri, sondaı-aq Aqtóbe, Qaraǵandy ​​oblystary sııaqty ónerkásiptik damyǵan óńirler.

Investor elder arasyndaǵy kóshbasshylar

— Qazaqstandyq ınvestorlar — 18,7 trln teńgeni quraıtyn 621 jobany qamtydy;

— Qytaı — 3,1 trln teńgeniniń 35 jobasy;

— Reseı — 5,9 trln teńgeniń 31 jobasy;

— Túrkııa — 1,6 trln teńgeniń 30 jobasy;

— BAÁ — 2,2 trln teńgeniniń 7 jobasy.

Ernar Seriktiń aıtýynsha, jobalardyń óńirler boıynsha birkelki bólinbeýi eldiń negizgi ındýstrııalyq aımaqtaryna ınvestıtsııa tartýdaǵy júıeli problemalardy baıqatyp otyr.

— Aıqyn básekelestik artyqshylyqtarǵa qaramastan, Aqtóbe jáne Qaraǵandy ​​oblystary ınvestıtsııalyq jobalardyń sany boıynsha aýtsaıderlerdiń qatarynan kórindi. Bul jergilikti bılik pen damý ınstıtýttarynyń jetkiliksiz belsendiliginiń, sondaı-aq ınvestorlardyń ózderi úshin tartymdy jaǵdaılardy kórmegeniniń belgisi. Jaǵdaı ózgermese, ekonomıkalyq áleýeti joǵary óńirler básekege qabiletti pozıtsııalaryn joǵaltý qaýpi bar, — dep jazdy sarapshy.

Onyń aıtýynsha, Qyzylorda jáne Soltústik Qazaqstan oblystaryndaǵy jobalardyń salystyrmaly túrde kóp bolýy bul óńirlerdiń belsendi túrde damyp, ınvestıtsııalyq tartymdylyq jaǵynan qarqyn alyp jatqanyn baıqatty.

— Pýldaǵy qazaqstandyq kompanııalardyń basym bolýy otandyq bıznestiń damyp kele jatqanyn ańǵartady. Degenmen, sheteldik ınvestorlar arasynda Qytaı, Reseı jáne Túrkııa ókilderiniń basym bolýy el ekonomıkasyna negizinen Qazaqstanmen turaqty saıası baılanystary bar memleketter ınvestıtsııalaıtynyn aıqyn kórsetti. Eýropa men AQSh ınvestorlarynyń eleýli úlesiniń bolmaýy olardyń saqtyǵyn, ıaǵnı osy elderdiń joǵary táýekelderge erekshe nazar aýdaryp otyrǵanyn bilderdi. Uzaq merzimdi perspektıvada bul jaǵdaı birjaqty táýeldilik qaýpin týdyrady jáne batystyń jańa tehnologııalary men ozyq basqarý standarttaryna qol jetkizýdi shekteıdi. Sondyqtan bul jaǵdaı ártaraptandyrylǵan baǵyttan kapıtaldy tartýǵa qatysty strategııany qaıta qaraýdy talap etedi, — dedi E. Serik.

Budan buryn habarlanǵandaı, 2030 jylǵa deıin kólik ınfraqurylymyn jaqsartýǵa 9 trln-nan astam teńge ınvestıtsııa salynbaq.