Qazaqstannyń halyqaralyq rezervteri 104,7 mlrd dollarǵa jetti – Tımýr Súleımenov

ASTANA. KAZINFORM – Ulttyq bank tóraǵasy Tımýr Súleımenov Prezıdent qabyldaýynan keıin ótken jylǵy atqarylǵan jumystyń esebin berip, bıylǵy josparmen bólisti.

- Ulttyq bank Úkimetpen birge ózara kúsh biriktire aldy. Sonyń arqasynda 2023 jyly 9,8% bolǵan ınflıatsııany 2024 jyly 8,6%-ǵa deıin tómendete aldyq. Qazaqstannyń halyqaralyq rezervteri $104,7 mlrd boldy. Jahandyq turaqsyzdyq jaǵdaıynda bunyń ózi ornyqtylyq máselesinde senimdi býferge aınaldy. Sonyń ishinde altyn-valıýta rezervteri 45,8 mlrd dollarǵa jetip, 27,5%-ǵa ósti. Óıtkeni altynmen operatsııalar júrgizilip, ınvestıtsııalyq tabys joǵary boldy. Búginde olardyń kólemi rekordtyq 52,3 mlrd dollarǵa jetti, - dep jazdy Tımýr Súleımenov Facebook paraqshasynda. 

Ulttyq bank tóraǵasy keltirgen málimetke súıensek, Ulttyq qordyń aktıvteri $58,8 mlrd boldy. Al, qordaǵy valıýtalyq portfeldiń kiristiligi 7,6%-ǵa jetti. Bul rette Ulttyq qordyń qarajaty eń negizgi degen ınfraqurylymdyq jobalarǵa ınvestıtsııalandy. 2024 jyldyń ózinde 238 mlrd teńge baǵyttaldy.

Sondaı-aq bir jyl ishinde BJZQ (Biryńǵaı jınaqtaýshy zeınetaqy qory) zeınetaqy aktıvteri 25,9%-ǵa ósip, 22,4 trln teńge boldy. Investıtsııalyq tabys 3,4 trln teńgege jetti. Bul kórsetkish — 2023 jylmen salystyrǵanda eki ese kóp. Zeınetaqy aktıvteriniń kiristiligi 17,8% boldy.

- Biz úshin Ulttyq tsıfrlyq qarjy ınfraqurylymyn damytý máselesi basym baǵyttardyń biri bolyp qala beredi. Eldegi qolma-qol aqshasyz aınalymnyń 90%-ǵa jýyǵy Ulttyq banktiń tólem júıeleri arqyly júrgiziledi. Memlekettik qarajattyń tıimdi ári ashyq jumsalýyn qamtamasyz etýge baǵyttalǵan pılottyq jobalar tsıfrlyq teńge platformasynda júzege asyrylyp jatyr. Telefon nómiri men QR-kod arqyly jasalatyn aýdarymdarǵa arnalǵan bankaralyq júıe iske qosylyp, oǵan barlyq bank qosyla bastady, - deıdi ol.

Odan ári T.Súleımenov tsıfrlyq qarjy aktıvteri naryǵyn quqyqtyq retteýge baǵyttalǵan zańnamalyq bazany qalyptastyrý jumysy bastalǵanyn málimdedi. Aıtýynsha, bıyl qarjy aktıvteri men naqty aktıvterdi jáne basqa da quraldardy qaýipsiz etý boıynsha birqatar pılottyq jobany iske qosý josparda bar. Bul, óz kezeginde, kapıtal tartý múmkindikterin keńeıtýge jol ashady.

- Bıyl ekinshi jartyjyldyqta arnaıy «synaq» rejımine kóshemiz. Onda biz shekteýli ári retteletin ortada qarjy aktıvterin, naqty aktıvterdi jáne basqa da quraldardy qaýipsiz etý boıynsha birneshe jobany iske qosyp kórmekpiz. Mysaly, qymbat baǵaly metaldardyń tsıfrlyq balamasyn shyǵara alsaq, ol úlken aýdıtorııa úshin ınvestıtsııaǵa qoljetimdilikti arttyra alar edi. Al debıtorlyq bereshekti qaýipsiz etý (faktorıng) shaǵyn jáne orta bıznes úshin aınalym kapıtalyn tartýǵa múmkindik beredi. Teńgemen qamtamasyz etilgen steıblkoın - tsıfrlyq aktıvtermen jasalatyn operatsııalar úshin qaýipsiz esep aıyrysý quralyna aınalýy múmkin, - dep tolyqtyrdy tóraǵa.

Memleket basshysy Ulttyq bank tóraǵasyna júktegen birqatar mindet:

- ınflıatsııany tejeý;

- rezervterdiń kólemin arttyrý;

- qarjy júıesine senimdi nyǵaıtý jáne tsıfrlyq ınfraqurylymdy damytý;

- tsıfrlyq qarjy aktıvterin quqyqtyq turǵyda retteý júıesin qalyptastyrý.

Osylaısha, Tımýr Súleımenov júıeli jumys jalǵasatynyn aıtyp otyr.

Keshe Memleket basshysy Qasym-Jomart Toqaev Tımýr Súleımenovti qabyldap, Ulttyq bank tóraǵasynyń jyldyq esebin qabyldady.