Ulttyń asqaq rýhty uly aqyny Temirhan Medetbek dúnıeden ozdy

ASTANA. KAZINFORM — Qazaqstannyń halyq jazýshysy, kórnekti aqyn Temirhan Medetbek dúnıeden ozdy. Qaraly habardy Jazýshylar odaǵy basqarma tóraǵasynyń orynbasary Qasymhan Begmanov jarııalady.

— Qazaq poezııasyna qubylys bolyp kelgen, ulttyń asqaq rýhty uly aqyny Temirhan Medetbek dúnıeden ótti.

Qarshadaıymnan óleńderin oqyp, qasyna ergen asyl aǵam, Qazaqstannyń halyq jazýshysy, Qazaqstan Memlekettik syılyǵynyń laýreaty, kórnekti aqyn Temirhan Medetbektiń dúnıeden ozǵanyn qazir ǵana Sholpan jeńgem maǵan eń birinshi habarlady.

Sońǵy aptada Temirhan aǵamyzdyń aýyr halde aýrýhanaǵa túsýine baılanysty otbasymen, dárigerlermen Jazýshylar odaǵynyń basshylary únemi habarlasyp turdy.

Qazaqstan Jazýshylar odaǵynyń tóraǵasy Mereke Qulkenov ekeýimiz eki kún barǵanda jansaqtaý bólimine kirgizbegen soń, men «Aǵa, biz kelip turmyz, janyńyzdamyz» dep hat jazyp, qaldyryp ketip edim. 

Búgin Mereke Qulkenov, onyń keńesshisi Ámirjan Qosanov jáne belgili kásipker Qanat Sánik tórteýmiz Almatydaǵy aýrýhanada — aǵamyz jatqan jansaqtaý bólimine kezekpen kirip, únsiz baquldasyp, qoshtasyp shyqqan edik. 

Iá, ótkende ǵana aǵamyzdyń 80 jasyn dúrkiretip Almatyda toılaǵan edik. 81 jasynda ómirden ótti, — dep jazǵan odaq ókili jelidegi paraqshasyna.

Ol alamanda aldyna jan salmaı shapqan daýylpaz aqynnyń dúnıeden ótýine oraı búkil qazaq halqyna, onyń oqyrmandaryna qatty qaıǵyryp, kóńil aıtqan.

Aıta keteıik, Temirhan Medetbek 1945 jyly 6 naýryzda Túrkistan oblysynda dúnıege kelgen.

Abaı atyndaǵy Qazaq memlekettik pedagogıka ınstıtýty (qazirgi Ulttyq pedagogıka ýnıversıteti) fılologııa fakýltetinde oqyǵan. 1968-2002 jyldary Radıo men televıdenıede, ártúrli gazet-jýrnalda, shyǵarmashylyq uıymdarda qyzmet atqarǵan. Qazaqstan Jazýshylar odaǵynda ekinshi hatshy boldy, 2003 jyldan «Aqıqat» jýrnalynyń bas redaktory.

Alǵashqy jyr jınaǵy «Janymnyń jas quraǵy» degen atpen 1970 jyly jaryq kórdi. Onnan astam óleń jınaqtary jarııalanyp, oqyrmandar men synshylardyń joǵary baǵasyn aldy.

«Abaı álemi» (1995) jáne «Baba dástúrdiń murageri kim: týǵan ádebıet týraly oılar» (2001) atty ádebı-syn eńbekterinde qalamger Abaı áleminiń poetıkalyq tereńdigin, qazaq mádenıetiniń damý sıpatyn saralap, aqyndyq psıhologııanyń ishki bolmysyna baǵa berdi.

Qazaq poezııasynyń túrkiler kezeńinen qalyptasqan romantıkalyq-realıstik órshil sarynyn ózindik kórkemdik sheshim aıasynda jańashyl týyndylarymen baıytty.

«Kók túrikter saryny» atty jınaǵynda (2002) zamana zary men búgingi kún máseleleri ejelgi túrki jyrlary úlgisinde aıtylǵan, aqyn kóne túrge jańa mazmun syıdyrǵan. 

Eske salaıyq, buǵan deıin maıdanger aqyn Ábý Sársenbaevtyń «Sen qurmette ony» óleńi kimge arnalǵanyn jazdyq.