Qazaqstannyń halyq ártisi Maıgúl Qazturǵanova ómirden ozdy

ASTANA. KAZINFORM — Belgili ánshi, Qazaqstannyń halyq ártisi Maıgúl Ibragımqyzy Qazturǵanova qaıtys boldy.

Mádenıet jáne aqparat mınıstrligi belgili ánshi, Qazaqstannyń halyq ártisi Maıgúl Ibragımqyzy Qazturǵanovanyń dúnıeden ótýine baılanysty marqumnyń otbasy men týystaryna, týǵan halqyna qaıǵyra kóńil aıtady.

— Maıgúl Ibragımqyzy — qazaqtyń dástúrli án ónerin órkendetýge úles qosqan qaıtalanbas daýys ıesi, ult maqtanyshy edi. Ol halyqtyq jáne kásibı kompozıtorlardyń tańdaýly týyndylaryn asqan sheberlikpen oryndap, ulttyq mádenıetimizdiń baı qazynasyn álemge tanytty. Óner jolyn áıgili Nurǵısa Tilendıevtiń jetekshiligindegi «Otyrar sazy» folklorlyq-etnografııalyq orkestrinde bastaǵan Maıgúl Ibragımqyzy ómir boıy qazaq óneriniń abyroıyn asqaqtatýǵa adal qyzmet etti. Onyń oryndaýyndaǵy shyǵarmalar el júreginen oryn alyp, qazaq mýzyka mádenıetiniń altyn qoryna qosyldy. Ómirin ulttyq mádenıet pen rýhanııatqa arnaǵan abzal jannyń adamdyq bolmysy, ónerge degen sheksiz súıispenshiligi men izgiligi keıingi býyn jastarǵa óshpes ónege bolyp qala bermek. Maıgúl Ibragımqyzynyń jarqyn beınesi, shyǵarmashylyq murasy ult jadynda máńgi saqtalady dep senemiz. Marqumnyń jatqan jeri jaıly, topyraǵy torqa bolsyn! Allanyń raqymy men meıirimi joldas bolyp, rýhy peıishte shalqysyn! — delingen mınıstrlik habarlamasynda.

Budan buryn kórnekti qalamger Qaıym-Munar Tabeev dúnıeden ozǵanyn jazǵanbyz.