Qazaqstannyń Áskerı-áýe kúshteri jylyna 600-ge jýyq ushý oryndaıdy

ASTANA. KAZINFORM - 2 shilde – Qazaqstan Áskerı-áýe kúshteri kúni. 1998 jyly 2 shildede Áýe qorǵanysy kúshteriniń Áskerı-áýe kúshterin qurý týraly dırektıva shyqty.

Osy ýaqyt ishinde áskerı avıatsııa keń aýqymdy tapsyrmalardy sheshýge qabiletti zamanaýı qýatty qurylymǵa deıingi joldan júrip ótti.

Áýe kúshteri memlekettiń qaýipsizdigin qamtamasyz etýde sheshýshi ról atqarady. Olardyń negizgi mindeti - áýe keńistigin qorǵaý, strategııalyq mańyzdy nysandardy búrkemeleý, Qurlyq áskerleriniń áreketine qoldaý kórsetý. Ushý bólimsheleri zamanaýı ushaqtarmen jáne tikushaqtarmen jabdyqtalǵan. Olardyń qatarynda kópfýnktsıonaldy Sý-30SM, Sý-27 joıǵysh ushaqtary, L-39 oqý-jaýyngerlik, Mı-171Sh jáne Mı-35M kóliktik-jaýyngerlik jáne soqqy berýshi tikushaqtary, sondaı-aq Airbus Military shyǵarǵan A-400M ushaqtary bar.

Qazaqstannyń Áskerı-áýe kúshteri úshin kásibı kadrlardy Aqtóbedegi eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteriniń áskerı ınstıtýtynda daıarlaıdy. Onda kýrsanttar teorııany meńgerip, zamanaýı trenajerlarda jattyǵady jáne ushýǵa daıyndyqtan ótedi. Instıtýt túlekteri ushqyshtar, shtýrmandar, tehnıkter jáne áskerı avıatsııa quramynyń basqa da mańyzdy sanattarynyń qataryn tolyqtyrady.

Ózgermeli geosaıası jaǵdaıda áýe kúshteri damýyn jalǵastyrýda. Osyǵan sáıkes oqý baǵdarlamalary qaıta qaraldy. Daıyndyqtyń jańa ádistemeleri engizilip, halyqaralyq jáne túraralyq oqý-jattyǵýlarǵa qatysý jandanýda. Mundaı is-sharalar tájirıbe almasýǵa, odaqtastarmen qarym-qatynasty shyńdaýǵa jáne jaýyngerlik daıyndyq deńgeıin arttyrýǵa múmkindik beredi.

Qazaqstandyq ushqyshtardyń kásibıligi men adaldyǵyn kórsetken jarqyn epızodtardyń biri 2024 jylǵy kóktemgi sý tasqyny kezinde oryn aldy. Kúrdeli aýa raıy jaǵdaıynda tikushaqtar men ushaqtardyń ekıpajdary turǵyndardy sý basqan eldi mekenderden evakýatsııalaýdy qamtamasyz etti. Bir aıda 600-ge jýyq ushý oryndalyp, 3,5 myńnan astam adam qutqaryldy. Eki myńǵa jýyq maman jáne 280 tonnadan astam gýmanıtarlyq júk tasymaldandy.

Osy jetistikterdiń artynda ushý jáne ınjenerlik quram, baılanysshy, meteorolog, tehnık jáne azamattyq qyzmetkerler sekildi úlken ujymnyń kúndelikti jumysy tur. Olardyń kásibıligi Qazaqstannyń senimdi jáne zamanaýı avıatsııasynyń negizi deýge turarlyq.

Aıta keteıik, «Aýmaqtyq qorǵanys týraly» zań Qarýly kúshterge júktemeni azaıtýǵa múmkindik beredi.