Qazaqstannyń altyn rezervi 345 tonnaǵa jetti

ASTANA. KAZINFORM — Byltyr Qazaqstan álemde eń kóp altyn satyp alǵan eki eldiń biri bolǵan. Úkimettiń keńeıtilgen otyrysynda Ulttyq bank tóraǵasy Tımýr Súleımenov osy saıasat týraly tolyǵyraq málimet berdi.

 — Ótken jyly altyn-valıýta rezervteri 65,4 mlrd dollar bolyp, tarıhı maksımal mánge jetti. Kiristilik 43% boldy. Byltyr ishki naryqta 66 tonna altyn satyp alyp, altyn satyp alý operatsııalary boıynsha álemde ekinshi orynǵa shyqtyq. Jyl sońynda altyn rezervi 345 tonnaǵa jetti, — dedi Tımýr Súleımenov.

Sondaı-aq, ol 2025 jyly tsıfrlyq aktıvter naryǵynyń zańnamalyq negizin qalyptastyrý jumysy aıaqtalǵanyn aıtty.

— Bıyl olar óndiristik aınalymǵa engizilip, retteletin krıptovalıýtalar aınalymy iske qosylady. Mamyr aıyna deıin Ortalyq depozıtarıı bazasynda tsıfrlyq aktıvterdi saqtaýǵa arnalǵan ulttyq krıpto-kastodıandyq servıs qurylady. Qarjylyq ınnovatsııalardy praktıkalyq turǵyda iske asyrý úshin retteý ortasy iske qosyldy. Qazir onda 10 baǵyt boıynsha 22 jańa joba bar, — dedi Ulttyq bank basshysy.

Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Jıynda eldiń 2025 jylǵy áleýmettik-ekonomıkalyq damýy qorytyndylanyp, Úkimettiń aldaǵy kezeńge arnalǵan negizgi mindetteri aıqyndalady.