Qazaqstannyń aqyly joldarynda kimder tegin júre alady
ASTANA. KAZINFORM — Jeńildik sanatyndaǵy kólik quraldary tizimine memlekettik jáne naqty bir aýdandarda tirkelgen azamattyq kólik quraldary kiredi, dep habarlaıdy Kazinform agenttiginiń tilshisi.

22 aqpanda QR Kólik mınıstriniń «Qostanaı — Reseı Federatsııasy shekarasy (Troıtsk baǵyty) avtomobıl jolynyń respýblıkalyq mańyzy bar ýchaskesin aqyly negizde paıdalaný týraly» buıryǵy kúshine endi.
— Bul ýchaske 2-shi jáne 3-shi tehnıkalyq sanattaǵy aqyly jolǵa jatady. Alaıda jeńil avtokólikter jol júrý aqysynan bosatylady, — dep túsindirdi Kólik mınıstrligi.
Sonymen birge, QR «Avtomobıl joldary týraly» zańynyń 5-2-babynyń 1-tarmaǵyna sáıkes, myna sanattaǵy kólikter aqyly joldarmen tegin júrý quqyǵyna ıe:
1. Qyzmettik mindetterin atqarý kezindegi arnaıy avtokólikter:
* jedel medıtsınalyq járdem kólikteri;
* apattyq-qutqarý qyzmetteriniń avtomobılderi;
* quqyq qorǵaý organdarynyń kóligi;
* kólik baqylaý organdarynyń avtokólikteri;
* arnaıy memlekettik organdardyń kóligi;
* QR Qarýly Kúshteri, basqa da áskerler men áskerı qurylymdardyń kóligi.
2. Joldardy kútip ustaý men jolaýshylar tasymalyna tartylǵan kólik quraldary:
* halyqaralyq jáne respýblıkalyq mańyzy bar aqyly joldardy kútip-ustaýmen jáne tehnıkalyq qyzmet kórsetýmen tikeleı aınalysatyn ulttyq operator kóligi;
* QR zańnamasyna sáıkes, belgili bir aqyly ýchaskeni kútip-ustaýmen aınalysatyn kontsessıoner kóligi;
* janýarlar dúnıesin qorǵaý, ósimin molaıtý jáne paıdalaný jónindegi ýákiletti organ kóligi;
* qala mańyndaǵy turaqty jolaýshylar men júk tasymaldaıtyn, sondaı-aq aqyly jolǵa jaqyn ornalasqan eldi mekenderdi aýdandyq jáne oblystyq ortalyqtarmen, astanamen nemese respýblıkalyq mańyzy bar qalalarmen baılanystyratyn avtobýstar;
* aqyly jolǵa irgeles aýdandar aýmaǵynda tirkelgen, bir aýdannyń ishinde paıdalanylatyn avtobýstar;
* jaqyn ornalasqan kólik aıryqtary arasyndaǵy ýchaskelerde sý aıdyndary men temir joldardy kesip ótý úshin aqyly joldardy paıdalanatyn júk kólikteri, ózdiginen júretin aýyl sharýashylyǵy mashınalary;
* aqyly trassaǵa irgeles aýdandarda tirkelgen jeke jáne zańdy tulǵalardyń bir aýdannyń ishinde qozǵalýyna arnalǵan jeńil avtomobılderi.
3. Ekinshi dúnıejúzilik soǵys ardagerleriniń jeńil avtomobılderi
Buǵan deıin avtobýstarda tegin júrýge, tólqujat pen jeke kýálikti aqysyz alýǵa kimderdiń quqyly ekenin, sondaı-aq qandaı azamattar notarıýs qyzmetterine jeńildikterdi paıdalana alatynyn aıtqan edik.