Qazaqstannyń 426 eldi mekeninde sý tapshylyǵy máselesi sheshimin tabady

ASTANA. KAZINFORM – 2030 jylǵa deıin sý salasyn damytý jónindegi keshendi jospar júzege assa,  sý resýrstaryn basqarý tujyrymdamasy, Sý únemdeý jónindegi jol kartasy, sondaı-aq jańa Sý kodeksin ázirleý ári iske asyrý máselesi qaralystyrlǵan. Bul týraly Úkimet málim etti.

Sý salasyndaǵy negizgi problemalardy — mysaly, aýyz sý men sýarmaly sýdyń jetispeýshiligin, sondaı-aq jıi bolatyn sý tasqynyn tıimdi sheshý úshin Úkimet sharalar keshenin qabyldaýda. Olardyń qatarynda 2030 jylǵa deıin sý salasyn damytý jónindegi keshendi jospardy, 2024-2030 jyldarǵa arnalǵan sý resýrstaryn basqarý tujyrymdamasyn, Sý únemdeý jónindegi jol kartasyn, sondaı-aq jańa Sý kodeksin ázirleý jáne iske asyrý bar. Bul bastamalar jaǵdaıdy júıeli túrde jaqsartýǵa baǵyttalǵan jáne jaqyn arada aıtarlyqtaı oń nátıjeler týraly aıtýǵa negiz beredi.

Eń aldymen, halyqty aýyz sýmen qamtamasyz etýge qatysty másele uzaq ýaqyt boıy shıelenisti bolyp keldi, ásirese aýyldyq jerlerde turǵyndar sapaly ári turaqty sýmen qamtamasyz etýdiń jetispeýshiligine tap boldy. Degenmen, 426 eldi mekendi jáne mıllıonnan astam adamdy qamtıtyn 28 ınfraqurylymdyq jobany júzege asyrýdyń arqasynda jaǵdaı aıtarlyqtaı jaqsarady dep kútilýde. Budan basqa, Aqtóbe oblysyndaǵy «Kókjıde» ken orny sııaqty jerasty kózderin damytý táýligine qosymsha 173,4 myń m3 sýmen qamtamasyz etýge múmkindik beredi.

— Egistikterdi sýarý máselesine keletin bolsaq, osyǵan deıin aýyl sharýashylyǵyn sýmen qamtamasyz etý turaqty júrgizilmeı qalǵanyn jáne tozǵan sýarý jelilerindegi shyǵyndar aıtarlyqtaı kólemge jetkenin atap ótken jón. Alaıda jaǵdaı túbegeıli ózgerýde: 20 jańa sý qoımasyn salý jáne 15 qoldanystaǵy sý qoımasyn qalpyna keltirý, sondaı-aq 14 myń shaqyrymnan astam sýarý kanaldaryn rekonstrýktsııalaý kózdelgen. Sonymen birge sý únemdeýdiń zamanaýı ádisteri, sonyń ishinde sý únemdeý tehnologııalaryn engizýdi sýbsıdııalaý engizilmek, bul qyzmetterdiń qunyn aıtarlyqtaı tómendetýge ákeledi, — delingen habarlamada.

Osylaısha, ónimsiz shyǵyndardy azaıtý arqyly agrarlyq sektor birtindep uzaq ýaqyt boıǵy sý tapshylyǵy jaǵdaıynan shyǵyp, turaqty ári únemdi sýmen qamtamasyz etýge kóshedi.

Saıyp kelgende, sý tasqynynyń aldyn alý salasynda da túbegeıli qadamdar jasalýda. Eger buryn árbir sý tasqyny maýsymy múlik pen aýyl sharýashylyǵyna zalal ákeletin bolsa, qazir kóktemgi sýlardy jınaqtaý úshin jalpy syıymdylyǵy 180 mln m3 deıingi sý qoımalary salynyp jatyr.

Sonymen qatar jańa normatıvtik aktiler sý tasqynyn basqarýdyń júıeli tásilin kózdeıdi, onda sý tasqynynyń edáýir kólemi sý jaıylmalaryna, kólderge jáne jaıylymdarǵa jiberiledi, osylaısha ekojúıelerdi qoldaıdy jáne shóleıttenýdiń aldyn alady. Sondaı-aq eldi mekenderdi sý tasqynynan qorǵaý úshin ınjenerlik qurylystar salýdy mindetteıtin normalar kózdelgen. Osynyń arqasynda Qazaqstan saldarlarmen reaktıvti kúresten sý tasqyny táýekelderin belsendi basqarýǵa dáıekti túrde kóship jatyr.

Osylaısha, Memleket basshysynyń tapsyrmalaryn dáıekti júzege asyrý nátıjesinde sý resýrstaryn basqarýdyń turaqty júıesi qalyptaspaq.

Aıta keteıik, bes jylda 40 tan astam jańa sý qoımasy salynbaq.