Qazaqstannyń 4 ýnıversıteti álemdik ozyq oqý oryndarynyń reıtıngine endi

ASTANA. KAZINFORM - Qazaqstannyń 4 ýnıversıteti Times Higher Education 2025 reıtıngine endi. Olar: Nazarbaev ýnıversıteti, ál-Farabı atyndaǵy Qazaq Ulttyq ýnıversıteti, L.N.Gýmılev atyndaǵy Eýrazııa Ulttyq ýnıversıteti jáne Sátbaev ýnıversıteti, dep habarlaıdy Kazinform tilshisi.

Nazarbaev ýnıversıteti 501-600 orynǵa jaıǵasyp, birneshe qatarǵa kóterildi. Ýnıversıtet, ásirese, «Bilim berý» sanaty boıynsha 251-300 dıapazonynda erekshelendi. Bul onyń osy saladaǵy muǵalimderdi daıarlaý men akademııalyq zertteýlerdegi kóshbasshylyǵyn aıqyndaıdy.

Ál-Farabı atyndaǵy Qazaq ulttyq ýnıversıteti 1201-1500 dıapazonyna jaıǵasyp, «Oqytý» jáne «Halyqaralyq kózqaras» sanattarynda aıtarlyqtaı jetistikter kórsetti.

L.N.Gýmılev atyndaǵy Eýrazııa ulttyq ýnıversıteti 1201-1500 dıapazonynda óz pozıtsııasyn saqtap, «Oqytý» jáne «Dáıeksózder» sanattary boıynsha baǵalaýda azdaǵan ózgerister baıqatty.

Ótken jyly 1501+ dıapazonynda bolǵan Sátbaev ýnıversıteti de óz pozıtsııasyn saqtap qaldy, biraq «Halyqaralyq kózqaras» sanaty boıynsha kórsetkishterdi jaqsartty.

Ozyq oqý oryndarynyń kóshin brıtanııalyq oqý orny bastap, birinshi orynǵa jaıǵasty. Oksford ýnıversıteti toǵyzynshy jyl qatarynan taǵy da úzdik dep tanyldy. Odan keıin AQSh-tyń Massachýsets tehnologııalyq ınstıtýty keledi. Al Garvard jáne Prınston ýnıversıtetteri úshinshi jáne tórtinshi oryndarǵa ıe boldy. Sońǵysy byltyrǵy reıtıngke qaraǵanda eki saty joǵarylady. Kembrıdj ýnıversıteti ótken jylǵy besinshi ornyn saqtap qaldy.

Ulybrıtanııa jáne AQSh joǵarǵy oryndary júldeger atansa, Eýropadaǵy birneshe ýnıversıtet artta qaldy. Tek Shveıtsarııanyń Tsıýrıh ýnıversıteti 11-oryndy ıelenip, ilgerileýshilik tanytty. Al Mıýnhen tehnıkalyq ýnıversıteti 26-orynǵa kóterilip, Germanııa tarıhynda bolmaǵan deńgeıge jetti. Bul osy eldegi ýnıversıtetterdiń qarqyndy damyp kele jatqanyn aıqyndaıdy.

Kerisinshe, Frantsııa, Nıderland jáne Shveıtsarııadaǵy birqatar ýnıversıtet sátsizdikke ushyrady. Mysaly, Delft tehnıkalyq ýnıversıteti 56-orynǵa túsip, Nıderland koroldigindegi joǵarǵy oqý oryndarynyń deńgeıi tómen ekendigin kórsetti.

Eýropalyq ýnıversıtetterdiń álsizdigine Azııadan, ásirese Qytaı, Ońtústik Koreıa jáne Japonııadan jetken básekelestik sebep. Azııa ýnıversıtetteri aıtarlyqtaı alǵa jyljyp, jahandyq reıtıngte tez kóterilip jatyr.

Reıtıng avtory 20 jyldyq tarıhy bar Times Higher Education jýrnalynyń jahandyq baılanystar jónindegi bas mamany Fıl Beıtı eýropalyq oqý oryndaryn kóshten qalyp qoımaýǵa úndedi. Ol ásirese, Frantsııadaǵy 50 ýnıversıtettiń 19-nyń reıtıngi tómendep, 10-y tarıhta bolmaǵan nashar nátıje kórsetkenin atap ótti.