Qazaqstannan 41 qutqarýshy Túrkııaǵa kómekke attandy
Bul týraly QR Tótenshe jaǵdaılar jónindegi birinshi vıtse-mınıstri Ibragım Qulshymbaev aıtyp berdi, dep habarlaıdy QazAqparat tilshisi.
«Ózderińiz biletindeı, búgin tańerteń Túrkııa Respýblıkasynyń ortalyq bóliginde birqatar jer silkinisi boldy. Memleket basshysy Qasym-Jomart Toqaev Qazaqstannyń kómek kórsetýge daıyn ekenin málimdedi. Qazir TJ mınıstrliginiń qutqarýshylary «Búrkit» áýe kompanııasynyń ushaǵyna minip, Astanadan Almatyǵa barady. Almatyda mınıstrliktiń kúsh-quraly tolyǵymen Túrkııaǵa attanady», - dedi Ibragım Qulshymbaev «Jibek joly» telearnasynyń tikeleı efırinde.
Spıkerdiń aıtýynsha, Túrkııaǵa respýblıkalyq jedel qutqarý jasaǵynyń qutqarýshylary bara jatyr, olardyń kópshiliginde halyqaralyq qutqarýshy sanaty bar. Sondaı-aq, «Apat medıtsınasy» ortalyǵynyń medıtsına qyzmetkerlerin qosqanda, jalpy 41 adam Túrkııaǵa ushady.
«Ózimizben birge apattyq-qutqarý avtokólikterin, medıtsınalyq jabdyqtardy, pnevmo-modýldik shatyrlar, gıdravlıkalyq qutqarý quraldaryn aldyq. Oǵan qosa, QR Tótenshe jaǵdaılar mınıstrliginiń arnaıy kınologııalyq toby qyzmettik ıtterdi alyp barady. Túrkııaǵa jetken soń taǵy da baılanysqa shyǵyp, jaǵdaıdy baıandaımyz», - dedi birinshi vıtse-mınıstr.
Aıta keteıik, Túrkııanyń ońtústik-shyǵysyndaǵy Kahramanmarash provıntsııasynda zilzala qurbandarynyń sany myńnan asty, keminde 7 myń adam jaraqat aldy.
Sońǵy derekter boıynsha, Kahramanmarash, Kılıs, Dııarbakyr, Adana, Osmanıe, Gazıantep, Shanlyýrfa, Adııaman, Malatııa jáne Hataı provıntsııalarynda 2824 ǵımarat qıraǵan.
Prezıdent Qasym-Jomart Toqaev Túrkııa Prezıdenti Rejep Taııp Erdoǵanmen telefon arqyly sóılesip, qaıǵyra kóńil aıtty.
Prezıdent Túrkııanyń zardap shekken aýdandaryndaǵy izdestirý-qutqarý jumystaryna kómektesý úshin Qazaqstan shuǵyl túrde qutqarýshylar men dárigerler jiberetinin, sondaı-aq baýyrlas elge gýmanıtarlyq kómek kórsetýge daıyn ekenin jetkizdi.
