Qazaqstanmen saýda-sattyqty damytýǵa múddelimiz – Iran prezıdenti
ASTANA. KAZINFORM — Iran Qazaqstanmen saýda salasyndaǵy yntymaqtastyqty damytýǵa múddeli. Bul týraly Aqordada Memleket basshysy Qasym-Jomart Toqaevpen keńeıtilgen quramdaǵy kelissóz barysynda Iran Islam Respýblıkasynyń prezıdenti Masýd Pezeshkıan aıtty.
— Iran men Qazaqstannyń mádenı-rýhanı baılanystarynyń tarıhy óte tereńnen tamyr alady. Sol zamanda, Uly jibek joly kezinde de baılanystarymyz bolǵan. Qazaqstan táýelsizdik alǵanǵa deıin de qarym-qatynasymyz úzilgen emes. Qazaqstan qarym-qatynas biz úshin óte mańyzdy. Óıtkeni, Islam tóńkerisinen keıin kórshi musylman memlekettermen yntymaqtastyǵymyzdy damytyp kelemiz. Olardyń arasynda Qazaqstan biz úshin óte mańyzdy memleket, - dedi Iran prezıdenti.
Mártebeli meıman kóptegen halyqaralyq, aımaqtyq máselede Qazaqstan men Irannyń kózqarasy uqsas ekenin aıtty.
— EAEO, ShYU, IYU aıasyndaǵy yntymaqtastyǵymyz jyl saıyn damyp keledi. Bul baılanystardy tereńdete túsýge mindetimiz. Bizdiń aımaq problemasy kóp aımaq. Ókinishke oraı, aımaǵymyzda kóptegen problema bar. AQSh pen Batys elderi halyqaralyq quqyqty belinen basa otyryp, bizge kóptegen qıyndyq týdyryp otyr, - dedi Masýd Pezeshkıan.
Sonymen qatar Iran prezıdenti Qazaqstanmen aradaǵy taýar aınalymy bıyl 40 paıyzǵa óskenin atap ótti.
— Bul óte jaqsy kórsetkish. Biraq, saýda-sattyq salasynda munan da joǵary jetistikterge jete alamyz. Biz ótken kezdesýimizde saýda aınalymyn 3 mlrd dollarǵa jetkizýge keliskenbiz jáne osy jolda jumysymyzdy ary qaraı jalǵastyra berýimiz qajet. Biraq, bul rette bank salasyna qatysty másele bar. Ony da jaqyn arada sheshemiz dep úmittenemin. Iran EAEO arqyly Qazaqstanmen saýda salasyndaǵy yntymaqtastyqty damytýǵa múddeli, - dedi Iran prezıdenti.
Buǵan deıin Aqordada Memleket basshysy Qasym-Jomart Toqaev elimizge resmı saparmen kelgen Iran Islam Respýblıkasynyń prezıdenti Masýd Pezeshkıandy qarsy alǵanyn jazǵan edik.
Qazirgi ýaqytta taraptar joǵary deńgeıdegi kelissózder júrgizip jatyr. Onyń barysynda saýda-ekonomıkalyq, kólik-logıstıka jáne mádenı-gýmanıtarlyq salalardaǵy qazaq-ıran yntymaqtastyǵyn odan ári nyǵaıtý máseleleri talqylanbaq.
Buǵan deıin Kazimform-nyń analıtkalyq sholýshysy Astana men Tegeran arasyndaǵy kelissózdiń astaryna úńilip kórgen edi.