Qazaqstanǵa sheteldikterdiń saparyn rásimdeý tártibi jeńildeıdi
«Usynylǵan kelesi shara - ol vızalyq rejimge qatysty. Bul rette elektrondyq vızany alý aıasynda sheteldik týrıster úshin shaqyrtý tártibinen bas tartý usynylady. Osyǵan deıin habarlanǵandaı, jyl sońyna qaraı Qazaqstanda E-visa qanatqaqty jobasy iske qosylady. Oǵan sáıkes, 128 eldiń azamaty elimizge kelýge ruqsatty elektrondyq tásilmen alady. Árıne, bul qadam ońtaıly bolady. Alaıda sheteldikter úshin shaqyrtý tártibinen bas tartpasaq, atalǵan qanatqaqty joba tek vızany alý protsesin avtomattandyrý maqsatyn ǵana oryndaıdy. Sondyqtan biz shaqyrtý rejimin joıýdy talap etýdemiz. Quqyq qorǵaý organdary bul usynysqa qarsylyq tanytýda. Eger de «E-hotel» aqparattyq júıesin jappaı engizsek, onda quqyq qorǵaý organdary shaqyrtý tártibinen bas tartýǵa kelisip otyr», - dep toqtaldy E. Hasenov.
Onyń aıtýynsha, Úkimet basshysynyń orynbasary Asqar Jumaǵalıev atalǵan usynysqa qoldaý bildirgen. Osy oraıda QR Aqparat jáne kommýnıkatsııalar mınıstrligine Mádenıet jáne sport mınıstrligimen birlese «E-hotel» júıesin ázirleýdi pysyqtaý tapsyrmasy berildi. Sonymen birge, Investıtsııalar jáne damý mınıstrligine shetel azamattary boıynsha áýe tasymaldaýshylardan málimetter usynýǵa qatysty tapsyrma berilgen. Osy málimetter ulttyq qaýipsizdikti qamtamasyz etý úshin quqyq qorǵaý organdaryna qajet.
«E-hotel engizilse, onda UQK men Іshki ister mınıstrligindegi áriptester sheteldikterdiń tek shaqyrtýmen kelýi tártibinen bas tartýǵa ázir. Búginde Qazaqstanǵa kelý úshin kez kelgen sheteldik shaqyrtý alýǵa bir adamdy nemese týroperatordy tabýy kerek. Sáıkesinshe, bul rásimder belgili bir ýaqytty talap etedi. Sonyń saldarynan týrıster bul rásimderden qashyp, Qazaqstanǵa saparlaýǵa nıetti bolmaıdy», - dedi E. Hasenov.
Budan buryn habarlanǵandaı, Qazaqstannyń týrıstik jerlerin jarnamalaýǵa qajetti qarjy sheteldik týrısterge salynatyn alymnyń esebinen óndiriledi.
