Qazaqstanǵa Reseıden qaýipti vırýsy bar tuqym kirip ketken
ASTANA. KAZINFORM – Fıtosanıtarııalyq qyzmet Reseıden ákelingen qyzanaq tuqymynan qaýipti vırýs tapty.
«Astana temir jol» fıtosanıtarııalyq baqylaý beketteriniń ósimdikter karantıni jónindegi memlekettik ınspektorlary Reseı Federatsııasynyń aýmaǵynan ákelingen 2700 býma qyzanaq tuqymynyń qaýipti vırýspen zalaldanǵanyn anyqtady. Ónimdi elorda aýmaǵyna engizýge tyıym salynyp, «NTP Kazecotech» kompanııasynyń mamandandyrylǵan peshinde órteldi.
"Qyzanaqtyń qońyr qatparly vırýsy (tobamovırýs, ToBRFV) tuqymdarda saqtalady jáne baılanys arqyly ońaı taralady. Bul vırýstyń adam densaýlyǵyna zııany joq. Alaıda Solanaceae tuqymdas barlyq daqyldardy zaqymdaıtyn qaýipti patogen. Vırýs jappaı taralǵan jaǵdaıda alqaptaǵy ónim 80%-ǵa deıin joıylýy múmkin», - deıdi QR AShM AÓK MIK Astana qalasy boıynsha aýmaqtyq ınspektsııa basshysy Symbat Qalıasqarov.
Atalǵan fakti boıynsha ónim ıesine Ákimshilik quqyq buzý týraly kodekstiń 400-baby 2-bóliginiń 1-tarmaǵy negizinde ákimshilik is qozǵalyp, 103 376 teńge aıyppul salyndy.
«Sondaı-aq, Kenııada ósirilgen batys gúl trıpsi karantındik obektisimen zalaldanǵan 1320 dana raýshan, hrızantema jáne gıpsofıla gúl keskinderi de órteý ádisimen joıyldy. Kodekstiń 400-baby 2-bóliginiń 1-tarmaǵy negizinde ákimshilik ister qozǵalyp, ónim ıesine 251 056 teńge aıyppul salyndy», - delingen Astana qalasy fıtosanıtarııalyq qyzmeti taratqan málimette.
Mamandardyń aıtýynsha, atalǵan zııankes 250-den astam ósimdik túrin zaqymdaıdy. Onyń ishinde jemis-jıdek, kókónis pen gúlder bar. Zııankes ósimdiktik jasýsha shyryndarymen qorektenedi, jappaı taralǵan kezde ósimdikti soldyryp tynady. Bul zııankes te qyzanaqtyń qaýipti vırýstaryn da tasymaldaýshy bolyp esepteledi.
