Qazaqstanǵa kelgen týrıster qaı aımaqqa kóbirek barady

Ulttyq statıstıka bıýrosy 2023 jyldyń qańtar, shilde aılarynda týrıster arasynda iriktemeli zertteý júrgizdi. Oǵan 22,4 myń sheteldik qatysty, onyń 16,9 myńy – Qazaqstanǵa jeke maqsatpen kelgender, qalǵan 5,4 myńy – issaparǵa kelgen, dep habarlaıdy Kazinform.

Saparlaǵan óńirler boıynsha tizim basynda Astana, Almaty qalalary jáne Mańǵystaý oblysy tur.

"Týrısterdiń 31% kýrorttyq aımaqtarǵa barǵa, onyń ishinde týrısterdiń negizgi úlesi Almaty taý klasterin tańdaǵan – 57,7%, taǵy 14,7% Mańǵystaý óńirine barǵan.

Kelýshiler negizinen poıyzben (31,5%), ushaqpen (30,4%) jáne halyqaralyq avtobýspen (22,8%) saıahattap, týystaryna nemese tanystaryna toqtaǵan (52,3%), sondaı-aq, qonaqúılerge (24,9%), jaldamaly páterler men úılerge (18,4%) jáne basqa ornalastyrý oryndaryna (4,4%) ornalasqan.

Týrısterdiń ortasha alǵandaǵy saıahat uzaqtyǵy – 4 kún", - dep jazdy statıstıka bıýrosynan.

Kelýshilerdiń jalpy shyǵyny 3,6 mlrd teńgeni qurady. Onyń ishinde jeke maqsattar boıynsha 2,4 mlrd teńge, iskerlik maqsatta 1,1 mlrd teńge jumsalǵan.

Kelýshiler shyǵystarynyń negizgi úlesi halyqaralyq jáne Qazaqstan ishindegi jol shyǵyny (53,8%) men tamaqtaný (15,3%) boldy. Shyǵyndardyń az bóligi ornalastyrý oryndarynda turýǵa – 13%, taýarlardy satyp alýǵa – 13,7% tıesili.

"Zertteýge 66 elden kelgen týrıster qatysty, kelýshilerdiń eń kóp úlesi Reseı, Ózbekstan jáne Qyrǵyzstan elderinen boldy", - delingen jazbada.