Qazaqstanǵa kelgen ár týrısten qansha aqsha túsedi

ASTANA. KAZINFORM — Týrızm jáne sport mınıstrligi elge kelgen árbir sheteldik týrıst orta eseppen qansha aqsha qaldyratynyn aıtty.

Mınıstrliktiń málimeti boıynsha, byltyr Qazaqstanǵa eń kóp týrıst Ózbekstannan kelgen — 3,6 mln adam.

Odan keıin Reseı (2 mln adam), Qyrǵyzstan (1,6 mln adam), Tájikstan (0,7 mln adam) elderi tur. 

«Sondaı-aq, ótken jyldyń qorytyndysy boıynsha sheteldik kelýshiler sanynyń ósýi kelesi elderden baıqalady. Mysaly, Qytaıdan kelgen sheteldik azamattardyń aǵyny 20 eseden astam ósti (2022 jyly 17,7 myń adamnan 2023 jyly 367,4 myń adamǵa deıin). Úndistannan týrıster 3 ese (2022 jyly 28,3 myń adamnan 2023 jyly 78 myń adamǵa deıin), Ońtústik Koreıadan — 2,5 ese (2022 jyly 15,8 myń adamnan 2023 jyly 36,6 myń adamǵa deıin), Germanııadan — 50% — ǵa (2022 jyly 57 myń adamnan 2023 jyly 85 myń adamǵa deıin), BAÁ-nen 50%-ǵa (2022 jyly 6,5 myń adamnan 2023 jyly 10,5 myń adamǵa deıin) óskenin baıqaımyz», — dep jazylǵan mınıstrliktiń Kazinform saýalyna bergen jaýabynda.

Bul týrıstiń árqaısysy orta eseppen 1500 dollar qaldyrǵan.

«Ulttyq banktiń derekterine súıenetin bolsaq, alys shetelden kelgen týrısterdiń orta shyǵyny — shamamen 1500 AQSh dollary», — dep jazady mınıstrliktegiler.

Byltyr kelgen sheteldik týrısterdiń 84,4% — jeke kóligimen jáne avtobýspen, 10,6% — áýe kóligimen, 5%-ǵa taıaý bóligi — temirjol arqyly jetken.